Ukraina milliy havfsızlıq surası Ukraina Prezidenti Petro Poroşenko yolbaşçılığında Ukraina Prezidentine 60 künlik aribiy vaziyetni ilân etmek teklifini qabul etti. Bu, silâlı tecavüzge qarşılıq kösterüv, milliy havfsızlıqnı temin etüv ve Ukrainanıñ mustaqilligi ve topraq bütünligi ögünde turğan telükelerni yoq etüv içün kerekli şartlar yaratqan mahsus uquqiy tertiptir.

‘‘Ukraina Arbiy-deñiz Quvetlerine qarşı yapılğan bü tecavüz, ücüm, bu cümleden, ukrain deñizcilerine qarşı ateşniñ açıluvı hata, ya da tesadüf degil de, yaramay niyetnen yapılğan areketler olğanına dair red etilmez isbatlarımız olğanını ayrıca qayd etmege isteyim. Silânı qullanuv ağır neticelerge ketirdi, al-azırdaki malümatqa köre, 6 deñizci yaralanğan, olardan ekisi ağır aldadır’’, – dep qayd etti devletimizniñ Başlığı.

Prezident, ukrain deñizcileri ile bağ kesilgenini, 0lar öz reberiyeti ile bağlanıp olamağanlarını qayd etti. ‘‘Yazıqlar olsun ki, RF-nıñ, qaradeñiz flotu bölükleriniñ, RF Mahsus federal Hızmeti sıñır hızmetiniñ tecavüziy areketlerinden soñ olardan Ukrainanıñ egemenligine, mustaqilligine ve topraq bütünligine qarşı başqa ameliyatlarnı ve bu cümleden avadan ücümlerni beklemege mümkün’’, – dep bildirdi o.

‘‘Onıñ içün men Ukraina Prezidenti ve Ukraina Silâlı Quvetleriniñ Baş komandanı olaraq Ukraina Esas qanunına köre Arbiy kabinetniñ teklifine qol tutmağa – Milliy havfsızlıq ve mudafaa şurasınıñ oturuşına mütenasip qararnı teklif etip, onınen Ukraina Yuqarı Şurasına muracaat etmege qarar berdim’’, – dep qayd etti Petro Poroşenko.

‘‘Ukraina halq deputatlarına muracaat etip, olarğa yarın Kıyiv şeerine Yuqarı Şuranıñ nevbetten tış oturışında qapalı şekilde qarar leyhasını muzakere etmek ve devletimizniñ mudafaası içün kerekli qararnı qabul etmek içün toplanmağa rica etem’’, – dep qayd etti devletimizniñ Başlığı.

Prezident, arbiy vaziyet şaraitlerinde Ukraina nasıldır ücümge keçecegini red ete. ‘‘Ukraina yalıñız öz topraqlarınıñ, sıñırlarınıñ, vatandaşlarınıñ qorçalavınen oğraşacaq’’, – dep qayd etti o.

Ukraina Milliy havfsızlıq ve mudafaa Şurasınıñ mahsus uquqiy tertipni – arbiy vaziyetni ilân etüv aqqında qararına binaen, Baş ştabnıñ reisi – Ukraina silâlı quvetleriniñ Baş Komandanı Ukraina silâlı quvetleriniñ bütün bölüklerini tam arbiy azırlıqqa ketirilmesini emir etti.

Ukraina Prezidenti RF-nıñ akimiyetinden halqara uquqnıñ qaba bozuluvı ile yaqalanğan ve taqdirleri al-azırda belgisiz olğan ukrain arbiylerni deral azat etmege talap etti. Prezident qayd etti ki, Ukraina olarnı gemileri ile deral ukrain tarafında taqdim etmege talap ete. O, vaziyetni em Azaq deñizinde, em de bütün başqa yönelişlerde sakinleştirmege çağırdı.

Hatırlatmaq isteymiz ki, 2018 senesi boş ay 25 künü gemicilik serbestligini bozğan Rusiye Federatsiyasınıñ gemileri Odesa limanından Mariupol limanına ameldeki bütün çoqtaraflama ve ekitaraflama halqara añlaşmalarğa ve navigatsiya qaidelerine riayet eterek, deñiz seferini yapqan üç ukrain gemisine, yani ‘‘Berdânsk’’ ve ‘‘Nikopol’’ topçı katerlerine ve ‘‘Yañı qapu’’ reyd buksirine qarşı qanunsız şekilde silâlarını qullanıp, BMT Nizamnamesiniñ 2 maddesinde ve BMT Baş Assambleyası 1974 ilk qış ayı 14 künü qabul etken 29/3314 sanlı rezölütsiyada tecavüz olaraq tarif etilgen areketlerni yapıp, Rusiye Federatsiyanıñ Ukrainağa qarşı silâlı tecavüzini bir kere daa numayış etti. Asılında Rusiye Ukrainağa qarşı deñizdeki arbiy areketlerini kenişletti ve quvetleştirdi.