2018 senesi fevral 19 künü Ukraina Prezidenti, 1982 senesi qabul etilgen BMT deñiz uquqı Konventsiyasınıñ bozuluvı boyunca davanıñ Halqara tahkim makemesinde baqıluvında memleketimizniñ temsilciligi aqqında öz Emirini imzaladı. İşbü vesiqağa binaen, memleketimizniñ menfaatını Ukraina tış işler nazirniñ muavini Olena Zerkal qorçalaycaq. «Yarın, fevral 20 künü, mustaqil ve bağımsız Ukraina devletine qarşı Rusiye Federatsiyasınñ istilâsı başlanğanına 4 yıl tolacaq. Qırımnıñ qanunsız işğalinen başlanğan rus ordusınıñ tecavüzi Ukrainanıñ 4 yıllıq qaramaniy mudafaasını, devletimizniñ mustaqilligi, territorial bütünligi ve bağımsızlığı içün küreşini başlattı», – dep qayd etti emirini imzalamadan evel Prezident.

Bunınen beraber o, Ukrainanıñ iqtisadiy menfaatına büyük zarar ketirilgenini qayd etti. Misal olaraq, faydalı qazımtılar qanunsız alda çıqarıla, Ukraina devletiniñ ruhseti olmadan başlatılğan Kerç köpüriniñ qurucılığı tabiatqa, infrastrukturağa ve naqliyatqa büyük zararlar ketire.

Prezident ayrıca qayd etti ki, ‘‘Qırımnıñ Ukrainağa mesüpligi aqqında söz yürsetilmey’’: ‘‘Bu mesele qaviy, şartsız, onı kimse şübe altına qoymay. Mesele şunda ki, er saada tek Ukraina devletiniñ degil, Qırımda mülkiyetini ğayıp etken şahsiy yatırımcılarnıñ iqtisadiy menfaatlarını da qorçalamalımız’’.

Bunınen beraber Prezident bu makeme işlerini azırlağan ve ceryanlarda iştirak etip, öz faaliyetini faal ve qattı şekilde devam etken eñ yahşı mütehassıslardan ibaret olğan taqımnıñ rolüni qayd etti: ‘‘Bügün – nevbetteki basamaq. Biz BMT deñiz uquqı Konventsiyasınıñ bozuluvı boyunca davanıñ Halqara tahkim makemesinde baqıluvında Qara ile Azaq denizlerinde ve Kerç boğazında Ukrainanıñ menfaatını qorçalamaq maqsadınen devletimizniñ temsilciligi aqqında Emirni azırladıq’’.

Ukraina tış işler nazirniñ Avropa integratsiyası boyunca muavini Olena Zerkal, öz nevbette qayd etkenine köre, bügün Gaagağa yollanılacaq Memorandum deñiz uquqı Konventsiyasınıñ bozuluvı çerçivesinde Ukrainanıñ iddialarını seslendire. Bundan da ğayrı, tahkim muayen vaqıt müddetini, yani ne ve qaçan taqdim etilecegini belgiledi. ‘‘Asılında biz Rusiye Federatsiyası ile munasebetlerniñ  yalıñız uquqiy temellerge esaslanğan yañı çeşitini meydanğa ketiremiz’’, – dep qayd etti Olena Zerkal.

Ukraina Tış işler naziri Pavlo Klimkin qayd etkenine köre, Memorandum belli halqara mutehassıs, adliyeci ve alimlerden teşkil etilgen halqara taqımınıñ üç yıllıq faaliyetiniñ kerçek neticesi oldı. Vesiqanen bir sırada 500-den ziyade ilâve bulunmaqta. Nazir, bu Memorandım birinci olğanını, iyün ayında ise ırqçılıqnı ve terrorizmge qol tutuvnı yasaqlağan konventsiyalar boyunca yañı memorandumlar azırlanacağını qayd etti.

‘‘Yapqanlarımız – Rusiyeni bütün adliy cebe boyunca ertaraflama adliy vastalarnen eñmek teşebbüsidir. Eñ muimi ise, Rusiye aqlarımıznı bozğanı içün em cezalanır, em de onıñ fiyatını öder’’, – dep qayd etti Pavlo Klimkin. Nazirniñ aytqanlarına köre, bu faaliyet izçen sürette devam etilip, ukrain tarafınıñ küçlü taqımı devletimizni halqara makemede ve tahkimde temsil etecek.