2018 senesi berim (sentâbr) ayı 28 künü Ukraina Prezidentiniñ Qırım MC Daimiy Temsilcisiniñ Birinci muavini İzet Gdanov Ukraina Yuqarı Şurasınıñ insan aqları, milliy azınlıqlar ve milletlerara munasebetler meseleleri boyunca Komitetiniñ ‘‘Ukraina vatandaşlarını siyasiy sebepten ve qanunsız şekilde taqip etüvge alâqası olğan şahıslarğa qarşı sanktsıyalarnı qullanuv boyunca devlet siyasetini mükemmelleştirüv’’ mevzusında parlament diñlevlerini azırlav boyunca iş gruppasında iştirak etti.

Oturışta Ukraina halq deputatı Refat Çubarov, Komitet kâtibiyetiniñ azaları, Ukraina çetel işler Nazirliginiñ, Qırım MC Prokuraturasınıñ, Vaqtınca işğal etilgen topraqlar ve devlet içinde köçken şahıslar meseleleri boyunca Ukraina nazirliginiñ, Ukraina havfsızlıq Hızmetiniñ, cemaat teşkilâtlarınıñ vekilleri ve aq-uquq qorçalayıcılar iştirak etti.

Oturışta Ukraina vatandaşlarınıñ qanunsız şekilde taqip etilmesine alâqası olğan şahıslarğa qarşı sanktsıyalarnı qullanuvğa dair insan aqları boyunca Media teşebbüsi azırlağan malümatlar muzakere etildi. Sanktsıyalar cedveline kirsetilecek şahıslarnıñ hususiyetleri ve qabul etilgen sanktsıyalar tertibininiñ bozuluvı içün mesüliyet muzakere etildi.

Birinci muavin devlet organlarına vekâletleri çerçivesinde sanktsıyalarnı işletmek aqqını bermek kerek olğanını qayd etti.

Mevcut olğan cedvelge sanktsıyalar aqqında tekliflerni bere bilecek devlet organlarını ve Temsilcilikni qoşmağa teklif etti. Aylançıq yollarnen Ukrainanıñ vaqtınca işğal etilgen Qırım toprağında asılında iqtisadiy faaliyetlerini alıp barğan Ukraina vatandaşlarına ve hocalıq faaliyeti subyektlerine qarşı sanktsıyalar kirsetmek kerek olğanını qayd etti.

İş gruppasınıñ oturışı neticesinde ‘‘Sanktsıyalar aqqında’’ ameldeki Ukraina qanunına deñişmeler kirsetmek maqsadınen işbirlikni devam etmege qarar alındı.