2018 senesi ekim (oktâbr) ayı 2 künü Ukraina Prezidentiniñ Qırım MC Daimiy Temsilcisi Borıs Babin Ukraina Yuqarı Surası sağlıq saqlav meseleleri boyunca Komitetiniñ oturışında Ukrainanıñ vaqtınca işğal etilgen Qırım toprağında tıb saasında kerçek vaziyet ve qırımlılarğa Ukrainanıñ nezareti altında bulunğan topraqlarda tıbbiy hızmetlerni berüv boyunca maruza ile çıqışta bulundı.

Komitetniñ toplaşuvında, onıñ azalarından ğayrı, başqa halq deputatları, Ukraina Arbiy Quvetleri operativ merkeziniñ, cemaat teşkilâtlarınıñ ve matbuat vastalarınıñ vekilleri iştirak etti.

Borıs Babin öz çıqışında Ukrainanıñ vaqtınca işğal etilgen Qırım toprağında işğalci öz sağlıq saqlav tertibatını qurğanını, yarımadada qanunsız şekilde rusiye sağlıq saqlav standartlarını ve maqsatlı programmalarnı yürsetkenini bildirdi, tıbbiy saada mütehassıslarnıñ qıtlığı sebebinden yüz bergen kadrlar yetişmemezligine işaret etti.

Ukrainanıñ vaqtınca işğal etilgen Qırım toprağında kerçek sanitar-epidemiologik vaziyetke ve himiya sanayısınıñ faaliyeti neticesinde Şimaliy Qırımda yüz bergen ekologik buhranınıñ tıbbiy saada aqibetine ayrıca diqqat etildi.

Daimiy Temsilci Ukrainanıñ nezareti altında bulunğan topraqlarda em memleket içinde köçken şahıslar, em de vaqtınca işğal etilgen Qırımdan kelip ketken vatandaşlar içün keyfiyetli tıbbiy hızmetlerge irişimde ihtiyaç bar olğanını qayd etti.

Borıs Babin qırımlılar içün Ukrainanıñ oquv yurtlarında keyfiyetli tıbbiy tasil aluv imkânlarını yaratmaq maqsadınen tıbbiy tasil yurtlarını ‘‘Qırım-Ukraina’’ leyhasında iştirak etüvge celp etmek kerek olğanına işaret etti.

Maruzanıñ neticesi olaraq, Komitet Ukrainanıñ vaqtınca işğal etilgen Qırım toprağından istilânıñ devam etmesine qarşılıq kösterüv, Qırımda Ukraina devletiniñ, uquqiy şahıslarınıñ ve vatandaşlarınıñ aq-uquqlarını qorçalav boyunca 2018-2019 seneleri içün acele tedbirler Planınıñ mütenasip vazifelerine qol tuttı, bundan da ğayrı, parlament tarafından yapılacaq tedbirler üstünde de iş alınıp barılacaqtır.