Noyabr 2 künü 2017 senesi Ukraina Prezidentiniñ Qırım Muhtar Cumhuriyetindeki Daimiy Temsilcisi Boris Babin Avropa Havfsızlıq ve İşbirlik Teşkilâtınıñ (AHIT) Demokratik institutlar ve insan aqları boyunca bürosı (DİİAB) taradından Viyanada keçirilgen «Havfsızlıqqa kompleks yanaşmada serbest matbuat vastalarnıñ rölü» serlevalı qoşma keñeşinde iştirak etti. Keñişniñ birinci sessiyasında Boris Babin iştirakçi memleketlerniñ eyetlerine, AHIT-nıñ memur ve mütehassıslarına Qırımda serbest matbuat vastalarnıñ vaziyetini tarif etip, ukrain tilli matbuat vastalarnıñ yasaq etilgenine, qırımtatar matbuat vastalarnıñ faaliyeti sınırlanğanına, işğal etilgen topraqlardan qomşu Herson Vilâyetine qanunsız şekilde yayınlanğan tele ve radio yayınlarınıñ tesir etkenine, duşmanlıq tili ve tecavuziy teşviqat qozğalavına keñeş iştirakçileriniñ diqqatlarını çekti.
Bu nazar noqtası Ukraina Haber siyaseti nazirliginiñ Devlet kâtibiniñ, Qırımtatar Milliy Meclis azalarınıñ ve mustaqil matbuat vastalarınıñ vekilleriniñ çıqışları ile tasdıqlandı. Rusiye diplomatlarınıñ ve devlet matbuat vastalarında çalışqan «mustaqil jurnalistlerniñ» Qırımda sözde qayd olunğan ”yüzlernen” qırımtatar ve ”onlarnen” ukrain matbuat vastaları aqqında yañlış malümat bermek ıntıluvlarına iştirakçi memeleketlerniñ vekilleriniñ çoqusı doğru qıymet kestiler. Daimiy Temsilci Rusiye Federatsiyasınıñ devamlı tışqı tecavuzı şaraitlerinde rus matbuat vastalarınıñ askerileştirilmesini qayd etti ve Qırımnıñ içinde ve yarımadadan yayınlanğan informatsion tecavuzınıñ közetüvi boyunca AHIT-nıñ Mahsus közetüv missiyasınıñ faaliyetini quvetlendirmege çağırdı.
Daimiy Temsilci DİİAB-nıñ Qoşma keñeşi çerçivesinde Qırımtatar resurs merkezi QMC-nıñ vaqtınca işğali neticesinde zarar körgen Qırım jurnalistlerni celp etip keçirgen ”İşğal etilgen Qırımda tamır halqlarınıñ söz ve matbuat serbestlikleriniñ yasaq etilüvi” serlevalı tedbirde faal iştirak etti. Qırımda information getto vaziyeti, RF-ke boysunğan Qırım matbuat vastalarında nefret tili, tamır halqnıñ informatsion aqlarınıñ bozuluvı ve işğal olunğan topraqlardan Rusiye yayınlarınıñ artması aqqında maruzalar Avropa Birligi, Avstriya, Bulgaristan, Büyük Britaniya, Gürcistan, İtaliya, Litva, AQŞ, Qaradağ, İsveçiya ve başqa iştirakçi memleketlerniñ temsilcilerine taqdim etildi.
İştirakçi memleketlerge ve AHIT-nıñ bölüklerine İnternette mevcüt olmağan ve Qırımda basılğan yerli matbuatnıñ mündericesiniñ talili, Herson vilâyetine yayınlanğan Rusiye yayınlarınıñ menfiy tesiriniñ talili, işğalci akimiyetniñ faaliyetini doğru şekilde aydınlatqan mustaqil bloger ve strimerlerge qol tutuv kibi tehnikiy yardım lehalarnı işlemeğe teklif etildi.