Bugün Poloniya Cumhuriyetiniñ Seymi 414 rey ile “Qırımtatar halqınıñ genotsidi qurbanlarını añma aqqında” Qararnı tasdıqladı. Qararda 1944 senesi qırımtatar halqınınıñ Qırım yarımadasından sürgün etilmesi genotsid olaraq tanıla. Bundan ğayrı, Qararda Rusiye Federatsiyasınıñ Ukrainağa qarşı arbiy tecavuz vaqtında yapqan cinayetleri aqqında da söz yürsetile.

1944 senesi mayıs ayında Stalinniñ emirinen 2 kün içinde 200 biñden ziyade qırımtatar öz evlerinden, Qırım topraqlarından Orta Asiya ve Uralğa sürgün etildi. Sürgünlik yollarında ve sürgünlikniñ birinci yıllarında qırımtatar ealisiniñ eñ azdan 46% elâk oldı. O yıllarda Qırım yarımadasında tamır halqtan aman-aman kimse qalmadı ve basqıncılar onı bütünley ruslaştırmağa başladı, qırımtatarlardan qalğan er şeyni yoq ettiler.

Bu sene Sovetler akimiyeti tarafından qırımtatarlarğa qarşı yapılğan sürgün cinayetiniñ 80-ncı yılı oldı. Ukraina sürgünlikni 2015 senesi, Letoniya ve Litvaniya 2019 senesi, Kanada ise 2022 senesi qırımtatar halqınıñ genotsidi olaraq tanıdı. Mayıs ayında Ukraina Yuqarı Şurası çetel memleketlerniñ ükümetlerine ve parlamentlerine, halqara teşkilâtlarğa ve parlament meclislerine 1944 senesi sürgünini qırımtatar halqınıñ genotsid aktı olaraq tanımaq içün muracaat etken edi.