Sentyabr 28 künü Ukraina Prezidentiniñ Qırım Muhtar Cumhuriyetindeki Daimiy Temsilcisi Borıs Babin Odessa şeerinde icraci akimiyet ve uquq qorçalayıcı organlar reberiyetleri, ordu komandanlığı, halqara teşkilâtları ve çetel memleketlerniñ vekilleri iştiragi ile olıp keçken ‘‘Sıñırlar üstü işbirliknen bağlı meseleler ve olarnıñ çezilüvi’’ serlevalı regional tögerek masada bulundı.

Tögerek masanıñ açıluvında çıqışta bulunğan Daimiy Temsilci, işğalci akimiyet umum kriminal сinayetçilikni ve teşkil olunğan cinaiy gruppalarnı qullanıp Qaradeñiz regionında yaratqan telükelege diqqat çekti.

Qıta Ukraina ve vaqtınca işğal olunğan Qırım MC arasında alıp barılğan uyuştırıcı, silâ ve insan ticareti sebebinden peyda olğan havflar, qaparcılıqnen bağlı telükeler  qayd etildi.

Bundan da ğayrı, istilâcı memleket Ukrainanıñ Qaradeñiz regionındaki iqtisadiy zonasını silâlandırmağa tırışqanına, qanunsız şekilde zapt etilgen ‘‘Çornomornaftogaz’’ yapılarında RF-nıñ askerlerini, silâlarını ve istihbarat vastalarını yerleştirgenine ve böyleliknen  qanunsız şekilde öz arbiy bazalarını teşkil etkenine diqqat çekildi.

Rusiye istilâsı ticariy deñizcilik ve grajdanlıq aviatsiya içün yaratqan telükeler ket-kete regional meseleden global meselege çevirilgenine de ayrıca diqqat çekildi.

Tögerek masa çerçivesinde Daimiy Temsilciniñ Baş arbiy prokurorı general-leytenant Anatoliy Matios ve Ukraina Arbiy deñiz quvetleri Komandanı vitse-admiral Igor Voronçenko ile olup keçken iş körüşmeleri devamında Temsilcilikniñ vazifelerini ve Ukraina Prezidentiniñ avalelerini yerine ketirilmesi içün ameliy işbirlik şekilleri muzakere ettildi.