2018 senesi arman (avgust) ayı 16 künü Ukraina Prezidentiniñ Qırım MC Daimiy Temsilcisiniñ Birinci muavini İzet Gdanov Ukraina infrastruktura Naziriniñ Birinci muavini Yuriy Lavrınük ile beraberlikte fizikiy ve uquqiy şahıslarğa qarşı sıñırlayıcı tedbirlerni (sanktsıyalarnı) amelge keçirüvnen, bu cümleden, işbu şahıslarnıñ Ukraina topraqlarında bulunğan mülkiyetni tosmenge tutuvnen bağlı areketlerni uyğunlaştıruv boyunca Ukraina infrastruktura Nazirliginde idareler arası muşavereni keçirdi.

Muşaverede Ukraina Nazirler Şurası Kâtibiyetiniñ, Ukraina iqtisadiy inkişaf ve ticaret Nazirliginiñ, Ukraina adliye Nazirliginiñ, Ukraina havfsızlıq Hızmetiniñ, Ukraina sıñır Hızmetiniñ ve başqa idarelerniñ, müessiselerniñ ve şirketlerniñ vekilleri iştirak etti.

Muşavere devamında cinayetçilerge, bu cümleden, RF bayrağı altında yaldap, ‘‘Sanktsıyalar aqqında’’ Ukraina qanunı boyunca Ukraina havfsızlıq ve mudafaa Şurası qabul etken ve Ukraina Prezidenti 2018 senesi qural ay (mayıs) 14 künü imzalağan № 126/2018 qarar ile kelecek 3 senege belgilengen sanktsıyalar cedvelinde bulunğan rusiye şirketine ait olğan ‘‘Mehanik Pogodin’’ gemisine qarşı mahsus sıñırlayıcı tedbirlerni (sanktsıyalarnı) yerine ketirüv vastaları muzakere etildi. Muşavereniñ iştirakçileri sanktsıyalar aqqında Ukraina qanuniyetini semereli şekilde yerine ketirmek maqsadınen vekâletleri çerçivesinde nevbetteki areketlerini uyğunlaştırdılar.