Ukraina Prezidentiniñ Qırım MC Temsilciligi elektrik, artezian suv ve mineral malzemelerni vaqtınca işğal etilgen Qırım ile memuriy sıñırından yarımadadaki şirketleriniñ qanunsız faaliyetleri içün teslim etüvni belgilemek içün 2017-2018 seneleri devamında kompleks tedbirlerni keçirdi.
Mütenasip malümatlar muntazam sürette Ukraina Prezidentiniñ Memuriyetine, Ukraina havsızlıq Hızmetine ve başqa vekâletli devlet teşkilâtlarına taqdım etile.
Ukraina Prezidentiniñ Qırım MC Temsilciliginiñ temelli haber-talil faaliyetiniñ neticesi olaraq, 2018 senesi ekim (oktâbr) ayı 11 künü Temsilcilik Ukraina havfsızlıq Hızmetiniñ Merkeziy idaresi ve UHH Qırım MC Baş idaresi ile beraberlikte qıtada, yani Ukrainanıñ nezareti altında bulunğan Herson vilâyetiniñ Novotroyitskiy rayonında yerleşip, Merkeziy Sivaşnıñ tuzlı suvlarını Garbiy Sivaşqa teslim etken ve böyleliknen Ğarbiy Sivaş suvlarınıñ vaqtınca işğal etilgen Qırımdaki Yañı qapu şeerindeki soda ve brom zavodlarında kimiya istisalı içün ruhsetsiz işletilüvini temin etken ‘‘Kutaranska damba’’ pompa stantsiyasınıñ faaliyetini toqtatuv boyunca tedbirlerni keçirdi.
Matbuat vastalarnıñ ve cemaatnıñ vekillerini celp etken tedbirler kompleksi esnasında pompa stantsiyası vastasınen vaqtınca işğal etilgen Qırımdaki şirketke elektrik ile Sivaşnıñ tuzlı suvları sanayi acimda teslim etilgeni añlaşıldı. Vaqtınca işğal etilgen Qırımda mineral resurslarnı işletüv içün mütenasip ruhsetleri ve litsenziyaları olmadan çalışqan şirketler Sivaşnıñ tabiatına büyük zararlar ketire. Olar ve aracı teşkilâtlar tarafından topraqlarnı kiralav, aylıqlarnı tölev, pompa stantsiyasını tamirlev ve bunınen bağlı başqa işlerni keçirüv boyunca yapılğan qanunsız faaliyet ‘‘«Qırım» serbest iqtisadiy zonasını teşkil etüv ve Ukrainanıñ vaqtınca işğal etilgen topraqlarında iqtisadiy faaliyetniñ hususiyetleri aqqında’’ 2014 senesi qabul etilip, ale daa lâğu etilmegen Ukraina Qanunı sebebinden mümkün oldı.
Yaqınlarda Temsilcilik 2014 senesi qabul etilgen işbu qanunnı umumen olaraq lâqu etken, amma milliy menfaatlarımızğa ve insan aq-uquqlarınıñ qorçalavına hızmet etken ayrı maddelerini saqlap qaldırğan ‘‘Vaqtınca işğal etilgen Ukraina topraqlarında vatandaşlarnıñ aq-uquqlarını ve serbestliklerini temin etüv ve uquqiy tertip’’ Ukraina qanunınıñ leyhasını Ukraina Prezidentine onıñ Memuriyeti vastasınen taqdim etti.
Temsilcilik istilâcı devletniñ yolunda tabiy maniağa çevirilgen Sivaşnıñ muitini qorçalav ve suvlarınıñ işletilüvini devlet nezareti altına deral qaytaruv oğrundaki faaliyetini öz vekâleti çerçivesinde devam etecektir.
