2018 senesi ekim (oktâbr) ayı 23 künü Temsilcilikteki halqara alâqalar ve uquqiy talil hızmetleriniñ baş mesleatçıları Valeriya Pahomova ve Ruslan Seydametov ‘‘Qırım evi yüreklerni birleştire’’ hayriye kontsertini ziyaret ettiler.

Kontsertte dünyaca belli gitara ustazı Enver İzmaylov, pianist ve bestekâr Usein Bekirov ile onıñ muzıka taqımı ve caz yırcısı Aysel Baliç çıqışta bulundılar. Kontsertte belli ve sevimli eserler, yañı caz usulında icra etilgen qırımtatar halq yırları yanğıradı.

Kontsertniñ esas maqsadı – rusiye akimiyeti tarafından makum etilgenleriniñ balalarına para yardımını toplamaqtır. Ukraina Prezidentiniñ Temsilciligi qırımlı siyasiy mabuslarnıñ qorantalarına ve Qırımdan kelgen başqa Ukraina vatandaşlarına olarnıñ muayyen meselelerini çezüvde öz vekâletleri çerçivesinde yardım etmektedir.