2018 senesi saban ayınıñ (mart) 1 künü Ukraina Yuqarı Şurası çetel devletleriniñ parlamentlerine ve halqara teşkilatlarınıñ parlament assambleyalarına RF-nıñ Ukrainağa qarşı silâlı tecavüzi neticesinde Ukraina vatandaşlarına qarşı siyasiy repressiyalarınıñ takbih etilüvi, Ukraina vatandaşları olğan siyasiy mabüsleriniñ azat etilüvi boyunca Muracaatını qabul etti.

Muracaat rusiye işğalci memuriyeti tarafından esas insan aq-uquqlarınıñ ve serbestlikleriniñ bozuluvını, bu cümleden, işğalge qarşı çıqqan insanlarnıñ siyasiy baqışları ve milliy mensüplikleri içün qanunsız taqip etilüvini, esassız ya da sahte qabaatlavlar sebebinden cemaat faalcilerge qarşı cinaiy işleriniñ açıluvını takbih etmege çağıra. Muracaatta RF tarafından qanunsız ya da siyasiy sebepten maküm etilgen 50-den ziyade Ukraina vatandaşınıñ tolu olmağan cedveli ketirile.

Muracaata medeniyetli halqlarğa ve halqara teşkilâtlarğa insan aq-uquqlarına riayet etüv saasınıñ daimiy şekilde nezaret etilmesi içün işğalci devletten halqara missiyalarnıñ ve uquq qorçalayıcı teşkilâtlarnıñ vaqtınca işğal etilgen Ukraina topraqlarına maniasız kele bilmelerini talap etmege teklif etile. Muracaat Ukraina vatandaşları olğan siyasiy mabüsleriniñ taqip etilüvinde qabaatlı olğan RF devlet akimiyetiniñ memurlarına qarşı bütün sanktsiya çeşitlerini qullanmağa çağıra.