Oktyabr 28 künü Ukraina Prezidentiniñ Qırım Muhtar Cumhuriyetindeki Daimiy Temsilcisiniñ birinci muavini İzet Gdanov Ukraina Tış işler nazirligi tarafından teşkil etilgen siyasiy mabüslerniñ azat etilüvi boyunca Cemaat platformasınıñ toplaşuvında iştirak etti. «Bu fevqulâde toplaşuvdır. Qırımtatar Milliy Meclis reisiniñ muavinleri Ahtem Çiygoz ve İlmi Umerov bizge qoşulğanlarından pek memnünim, olar içün Rusiyeniñ qıynavları artta qaldı», – dep qayd etti toplaşuv açılışında Ukraina Tış işler naziri Pavlo Klimkin.

Toplaşuvda Ukraina halq deputatları – Qırımtatar halqınıñ meseleleri boyunca Ukrayna Prezidentiniñ yardımcısı Mustafa Cemilev ve Qırımtatar Milliy Meclis reisi Refat Çubarov, mütenasip nazirliklerniñ ve idarelerniñ itibarlı memurları, siyasiy mabüslerniñ azat etilüvi boyunca Ukraina Tış işler naziriniñ mahsus temsilcileri Yuriy Yatsenko ve Gennadiy Afanasyev, cemaat teşkilâtlarınıñ temsilcileri de iştirak etti.

Toplaşuv iştirakçileri Rusiye tarafından qanunsız şekilde tutılğan Ukraina vatandaşlarınıñ azat etilüvine, olarnıñ ailelerine yardım etilüvine, vaqtınca işğal olunğan Qırımda Ukraina vatandaşlarınıñ maarifke ve bütün memuriy hızmetlerge irişimlerine yönelgen muayyen adımlar aqqında añlaştılar.