Aman-aman 8 yıl evelsi, Qırım işğaliniñ arfesinde, skit zamanlarına ait olğan 565 eksponat bir qaç Qırım müzeyini terk etken edi. Olar yarım yıl devamında Amsterdamdaki Allard Pirson müzeyinde sergilenip, keri qaytacaq edi. Amma 2014 senesiniñ baarinde yüz bergen vaqialar er şeyni deñiştirdi.
Felemenk devleti ukrain yarımadasınıñ Rusiye tarafından ilhaq etilmesini tanımadı, onıñ içün Allard Pirson müzeyiniñ hadimleri, eksponatlarnı nasıl etip, ne vaqıt ve eñ esası, kimge qaytaracaqlarını bilmey edi.
Serginiñ Kıyivden kelgen qısmı Ukraina paytahtına qayttı, Qırımdan kelgen qısım ise Felemenkteki müzeyde saqlana edi.
Ve niayet Amsterdam mahkemesi sergide bulunğan eksponatlarnıñ Ukrainağa qaytarılacağını qarar etti.
”Skit altını” tek Ukrainada degil de, bütün dünyada qıymeti biçilmez tarihiy ve medeniy emiyetke saiptir. Onıñ içün bu adise, yalıñız qıymetlerniñ evlerine qaytması degil de, bizim tarihımıznıñ qaytmasıdır.
İşğalniñ soñunace ”skit altını” qıtada saqlanacaq, ondan soñ ise Qırımdaki evine qaytacaqtır. Ukraina Prezidenti Volodımır Zelenskıy aytqanı kibi, «Biz daima bizge ait şeylerni qaytaramız. Başta ”skit altınını”, soñra ise Qırımnı da qaytarırmız».