Rus işğalcileri tarafından daimiy şekilde yapılğan zulum ve repressiyalarğa baqmadan, vaqtınca işğal etilgen Qırımda yaşağan semetdeşlerimiz er kün öz cesürligini ve boysunmazlığını köstereler. Olar ümütlerini coymayıp, yarımadanıñ er türlü azat etilecegine işançlarını ve Ukrainağa sadıqlığını qorçalaylar.

Qırım sakinleri arasında vaziyet ve rus teşviqatınıñ añlatuvlarını yoq etken insanlar aqqında  Milliy qarşılıq merkezinen berabe r#qarşılıq_areketi rubrikamızda bildirmege devam etemiz.

İşğalci idaresi Qırım sakinlerini Ukrainağa yardım etkenleri, ukrain ve qırımtatar kimliklerini ifade etkenleri, rus işğali ve arbiy tecavuzğa qarşı er angi bir tenqid içün sistematik sürette taqip ete. Daa 2022 senesi rusiye öz cinaiy ve memuriy qanuniyetine deñişmeler kirsetip, sözde “rusiye federatsiyasınıñ silâlı küçlerini itibardan tüşürüv” içün cezalandırma qoştı. Bu ise faallerge, jurnalistlerge ve adiy vatandaşlarğa basqı köstermek içün qoşma bir alet oldı. Bu afta böyle vaqialar qayd etildi:

Aqyar sakini çatlardan birinde rusiye işğalci ordusınıñ areketlerini tenqid etti. İşğalciler adamnı tutıp, qanunsız “mahkeme”niñ qararınen oña 40 biñ ruble (aman-aman üç minimal aylıq) memuriy cöreme belgiledi.

Yanı Qapu sakini İlya Tsapov içtimaiy ağlarda rus işğalcilerini tenqid etti, Ukraina Silâlı Quvetlerini desteklegenini bildirdi, işğalcilerge qarşı turmağa çağırdı, vatanperverlik şiarlarını yayınladı. İşğalciler 39 yaşındaki adamnı tutıp, onı kamera ögünde afu soramağa mecbur etip, bir qaç raport tizdiler, materiallar ise qanunsız “mahkemege” yollanıldı.

Keriçli Mıhaylo Solovyev içtimaiy ağlarda Rusiye işğalci idaresini tenqid etti. İşğalciler 50 yaşındaki adamnı tutıp, onı kamera ögünde afu soramağa mecbur ettiler, memuriy raport tizdiler ve materiallarnı qanunsız “mahkemege” berdiler.

Aqyar sakini Ukraina arbiy istihbaratı içün işğalcilerniñ silâlı küçleri aqqında malümat toplağanı idda etildi. İşğalciler qadınnı tutıp aldılar, işğalci “mahkeme” ise onı beş yıl apis cezasına mahküm etti. 

Aqyar sakini 2023 senesi qorantasınen işğal etilgen yarımadadan çıqıp İspaniyağa ketti, 2024 senesi ise öz mülküni satmaq içün şeerge qaytıp keldi. İşğalciler adamnı tutıp, onı Ukraina Silâlı Quvetlerini maliyetleştirüvde qabaatlap, “devlet satqınlığında” qabaatladı ve onı maksimal havfsızlıq koloniyasında 12 yılğa mahküm etti.

2022 senesi rusiyeniñ Ukrainağa qarşı başlatqan tam miqyaslı ücüminden soñ peyda olğan ve quvetleşken teşkilâtlar ile qarşılıq areketleri de er kün işğalcilerge qarşılıq köstermege devam ete:

• “ATEŞ” qarşılıq areketiniñ faalleri işğalcilerniñ arbiy obyektlerini araştırmağa devam ete, hususan, olar Keriç köpürinden köçürilgen yaqıt areketini qayd eteler, arbiy yükniñ taşuv kölemlerini ve cedvelini bildireler. Areketniñ azaları ayrıca işğalcilerniñ komandanlığı ayrı zenit-raketa bölüklerini işğal etilgen yarımadadan rusiyege keçirgenlerinin bildireler, olar bunı Ukraina Havfsızlıq ve Mudafaa Quvetleri tarafından neft anbarlarına ve arbiy infrastrukturağa yapılğan ücümlernen bağlaylar.
• “Sarı şerit” areketiniñ faalleri Qırımda işğalcilerge qarşı küreşini devam eteler, teşviqat materiallarını yoq eteler ve patriotik timsallerni darqatalar, hususan Aqmescitteki Cenakay-Qır (Petrovski skeli) yüksekliklerinde, Salğır kenarlarında, Yaltanıñ tarihiy merkezinde, Aqyarda ve Baydar uvasında.
• “Zla Mavka” qarşılıq areketi öz küreşini devam etip, rus işğalcileriniñ cinayetlerini qayd etip, dünya cemaatçılığına açıqlay, aynı vaqıtta Qırım şeerlerini patriotik timsallernen yaraştıra.
• “Qırım cenk çağaları” areketiniñ faalleri vaqtınca işğal etilgen Qırımdaki satqınlarve rusiye cenk cinayetçileri aqqında malümatnı sistemalı sürette toplap, neşir etmege devam eteler.

Fevralniñ 13-na qadar, rusiye işğalci idaresi terrorizm, ekstremizm, satqınlıq kibi uydurma cinayetlerde qabaatlanıp, 221 adamnı, şu cümleden 134 qırımtatarını qanunsız şekilde tevqif etti. Bularnıñ episi qırımtatarlarğa ve işğalge qarşı çıqqan, öz medeniy ve milliy kimligini saqlamağa tırışqan insanlarğa qarşı rusiyeniñ keniş basqı kampaniyasınıñ bir qısmıdır. Bunen bağlı soñki vaqialar:

• İşğalcilerniñ areketlerini tenqit etkeni içün işğalci quvetleri tarafından tevqif etilgen ve para cezası alğan kör faal İgor Nikitenko işğalci politsiya hadimleriniñ areketlerine qarşı bir qaç şikâyet yazdı – hususan, öz evinden elge keçirilgen tehnikanı, reabilitatsiya donatmalarını, gacetlerni qaytarmalarını talap etti. Nikitenkonıñ aytqanına köre, elge keçirilgen tehnikanıñ fiyatı 110 biñ ruble, yañılarını ise öz küçünen almağa çaresi yoq.
• Rusiye işğalcileri tarafından qanunsız şekilde 14 yılğa mahküm etilgen aq-uquq qorçalayıcısı ve “Qırım birdemligi”niñ sabıq koordinatorı Server Mustafayev bel kemiginde ağrılardan, em de psoriazdan şikâyet ete, bu hastalıq onı rusiyeniñ tambov şeerindeki 1-nci sanlı koloniyasına avuştırğanlarından soñ başlandı.
• Qanunsız olaraq doquz yılnı apiste keçirgen qırımtatar faalleri Rustem Abiltarov, Zevri Abseitov ve Remzi Memetov azat etildiler. Olar 2016 senesi mayısnıñ 12-nde  uydurılğan terrorizm qabaatlavlarınen işğal etilgen Bağçasarayda tutıp alındı, 2018 senesi ise rusiyeniñ rostov-na-donu şeerinde mahküm etilgen ediler.

İşğalci “mahkemelerde” sözde “rusiye federatsiyasınıñ silâlı küçlerini itibardan tüşürüv” maddesi boyunca qanunsız memuriy davalarnıñ sayısı artqanı da Qırımda işğalge qarşı qarşılıqnıñ quvetleşkenini köstere. 2025 senesi yanvarniñ 31-ne köre, rusiye federatsiyası memuriy uquq bozuvları kodeksiniñ 20.3.3 maddesine köre tizilgen ve vaqtınca işğal etilgen Qırımdaki sözde “mahkemelerge” ve başqa vekâletli organlarğa yollanılğan  1203 vaqia qayd etildi. 

Olar arasında 1058 adisede para cezası şeklinde memuriy ceza berilmesi ya da başqa davağa qoşulıp, umumiy tedbir çıqarılması aqqında qarar berildi. 42 adise alâ daa baqıla. Cinslerge köre qadınlarğa qarşı 489 (46%), erkeklerge qarşı ise 568 (54%) qarar çıqarıldı. Episi olıp, qullanılğan cerimelerniñ umumiy miqdarı endi eñ azından 34,15 million rus rubleni teşkil ete.

Er biriñizge köstergeniñiz cesaret ve açıq vatandaşlıq nazar noqtañız içün teşekkürler bildiremiz. Qırım – Ukrainadır, biz Qırımnı tez vaqıtta azat etmek ve işğal altında yaşamağa mecbur olğan semetdeşlerimizge havfsızlıq duyğusını qaytarmaq içün beraberlikte küreş alıp baramız.

Ukrainağa şan-şüret!