Rusiye vaqtınca işğal etilgen Qırımda yaratqan çoq yıllıq basqı ve qorqutuv müitine baqmadan, o, yarımadadaki qarşılıq devam ete. Qırım sakinleri serbestlik ve havfsızlıqlarını telüke astına qoyıp, öz noqta-i nazarını bildirmege ve Ukrayinağa qoltutmağa devam eteler. Cevap olaraq işğalci memuriyet repressiyalarnı quvetleştire, taqiplerni arttıra ve uydurılğan davalarnı aça.

Milliy Qarşılıqlar Merkezinen beraberlikte alıp barılğan #qarşılıq_areketi teşebbüsi çerçivesinde, işğalge baqmadan, ukrayin menliginden vazgeçmegen insanlarnıñ şaatlıqlarını toplay ve aydınlatamız. Bundan da ğayrı, biz işğalci akimiyetniñ cinayetlerini ve tınç sakinlerge qarşı zorbalıqnı vesiqalaymız. Bu ikâyeler, qorqu serbestlikke olğan istekni yoq etip olamağanınıñ, qarşılıq ise eñ qaranlıq zamanlarda bile devam etkeniniñ isbatıdır.

• Qırımlı uquq qorçalayıcısı Abdureşit Cepparovğa rusiyeli “politsiya hadimleri” qırımtatar halqı sürgünliginiñ qurbanlarını añma künü arfesinde “qanun bozulmasına yol berilmemesi” aqqında tenbi bildirdi. Resmiy sebep, “ekstremist” maddeleri içün evelden memuriy mesüliyetke çeküv oldı. Bundan ğayrı, qırımtatar faali Muslim Zevriyevge de tenbi bermege tırıştılar. Onıñ vesiqanı almağa red etkeninden soñ, ondan öz mevamını kamerağa bildirmesini rica ettiler ve yiberdiler.
• Sözde ”Aqyar politsiyası”, 23 yaşındaki tehnikum studentini açıq bir çatta tefsizler sebebinden tutıp alğanını bildirdi, çünki quvetçiler bu tefsizlerni “ekstremistik” olaraq sayğan. Oña qarşı “ekstremist faaliyetine açıq çağıruvlar” maddesi bıyunca cinaiy dava açıldı, bu ise beş yılğa qadar apis cezasını közde tuta.
• İşğal etilgen Keriçniñ sakini İgor Boyko “devlet hainliginde” qabaatlanıp, 18 yılğa qadar sert rejimli koloniyada qalmasına üküm etildi. İşğalci mahkemeniñ iddalarına köre, o, SBU temsilcisine rusiye patrul gemisiniñ videosını yollağan. Bundan da ğayrı, oña 400 biñ ruble para cezası ve 1,5 yıl azatlıqtan marum etüv cezası berildi.
• Rusiye mahkemesi ukrayin Roman Klükinni ”terroristik teşkilâtnıñ faaliyetinde iştirak etkeni ve casuslıq yapqanı” içün 22 yılğa mahküm etti. Rusiye quvetçileri, onıñ, Noman Çelebicihan batalyonında hızmet etip, rusiye arbiyleri aqqında malümat toplağanını iddia ete.
• 2025 senesiniñ yazında ğayıp olğan Yañı Qapu sakini Dmıtro Kolada Aqmescitniñ 2-nci SİZO-sında tapıldı. 2025 senesi avgust ayında tutulğanından soñ, o, tuvğanlarınen bağğa çıqma imkânından marum etilgen ve indokomunikadı statusında buluna.
• Qırımlı İzzet Halilov “devlet hainligi”de qabaatlanıp, 15 yılğa qadar sert rejimli koloniyada qalmasına mahküm etildi. Mahkemede, onıñ, sanki “duşmannıñ tarafına keçkenini” idda etti.
• Qırımnıñ 55 yaşındaki sakini Viktoriya Sergeyevanı “devlet hainliginde” qabaatlaylar, çünki o, Ukrayina silalı quvetlerine yardım etmek içün sanki para yollağan, qadın ise bunı red ete. Uquq qoruyıcılar, qadınnıñ Soçi ava limanında tutulğan soñ, zorbalıq ve zulümge oğrağanı aqqında bildire.
• Rusiye telükesizlik hadimleri Canköyde “Yegova şaatları” teşkilâtınıñ 86 yaşındaki azası Oleksandr Ursnıñ evinde tintüv keçirdi. Tahqiqat tedbirleri esnasında ondan şahsiy qaydları, tehnika, fleşkalar ve tahminen 100 biñ ruble para alındı. Cinaiy iş açılmasınıñ sebepleri aydınlatılmay.
• Sözde “Qırım ve Aqyar boyunca rusiye federatsiyasınıñ taqiqat komitetiniñ taqiqat idaresi” Cankoy rayonınıñ dört sakini rusiyede yasaq etilgen “Yegova şaatları” faaliyetini teşkil etkenlerinde şübeli sayılıp tutılğanını bildirdi. Tahqiqat, olarnıñ internette toplaşuvlar keçirip, teşkilât materiallarını tarqatqanlarını ve para toplağanlarını iddia ete.