Rusiyeniñ yarımadanı işğal etmesiniñ endi on eki yılı devamında Ukrayinanen bağlı er şeyge qarşı zorbalıq er kün devam ete. Repressiyalar, taqipler, uydurılğan mahkeme davaları ve öldürüvler rusiye tarafından qullanılğan alışılğan kontrol aletleridir. Amma bu şaraitlerde bile Qırım boysunmadı: yarımada Ukrayinanıñ parçası olıp qala, onıñ sakinleri ise, azatlığını ve ayatlarını telükege oğratıp, qarşılıq köstermege devam eteler.

Milliy Qarşılıqlar Merkezinen beraberlikte alıp barılğan #qarşılıq_areketi teşebbüsi çerçivesinde, işğalge baqmadan, ukrayin menliginden vazgeçmegen insanlarnıñ şaatlıqlarını toplay ve aydınlatamız. Bundan da ğayrı, biz işğalci akimiyetniñ cinayetlerini ve tınç sakinlerge qarşı zorbalıqnı vesiqalaymız. Bu ikâyeler, qorqu serbestlikke olğan istekni yoq etip olamağanınıñ, qarşılıq ise eñ qaranlıq zamanlarda bile devam etkeniniñ isbatıdır.

• Rusiye mahkemesi qırımtatarlarğa, şu cümleden Kurtnezirov Remzi, Ametov Nariman, Mamutov Ali, Mustafayev Vohid ve Halilayev Enverge nisbeten alıp barılğan cinaiy dava çerçevesinde üküm çıqardı. Erkeklerni “terror teşkilâtınıñ faaliyetini teşkil etüvde”, “cinayet azırlavda”, “akimiyetni zapt etüv ve elge keçirüvde” qabaatlaylar. İşğalci mahkeme bütün mabüslerni qabaatlı tanıp, olarnı sert rejimli koloniyada azatlıqtan marum etüv cezasına mahküm etti: Kurtnezirovğa – 20 yıl; Ametovğa – 15 yıl; Mamutovğa – 14 yıl; Mustafayevge – 14 yıl; Halilayevge – 14,5 yıl berildi. Mahkeme qanuniy quvetini qazanmayıp , temyiz arbiy mahkemesinde şikâyet etile bile
• Daa evel sözde “Qırım kurort ve turizm naziri” Vadim Volçenkoğa suiqast etüv içün 12 yılğa qadar apis cezasına mahküm etilgen qırımtatarı Mamut Belâlovğa qarşı ”devlet hainligi” maddesi boyunca dava açıldı. Aynı madde boyunca eki Qırım sakini de mahküm etildi.
• Aqmescit rayonınıñ sakini Ruslan Useinovnı Telegramda rusiyege qarşı sözde raketa darbelerine çağıruvlar yapqanı içün 6,5 yıl koloniya cezası berildi. Bundan da ğayrı, işğalciler Aqyar sakini İgor Domçenkonı ukrayin Telegram-çatlarında ”ekstremist faaliyetine” çağıruvlarda qabaatladı. Şimdi o, 5 yılğa qadar apis cezasını ala bile. İşğalciler, rusiyede Vatan qaramanları künü qayd etilgen dekabrniñ 9-nda rusiye federatsiyasınıñ hatıra künü timsallerini içtimaiy ağlarda tefsirler vastasınen “aqaretlegen” Aluşta sakinine qarşı cinaiy iş açtılar.
• Canköy rayonınıñ 42 yaşındaki sakini Ukrayina havfsızlıq hızmetine arbiy tehnika ve mudafaa inşaatlarınıñ resimleri ile fotoresim ve video malümatını bergeninde qabaatlanıp, 17 yılğa qadar apis cezasına mahküm etildi. Aynı vaqıtta FSB işğal etilgen Qırımnıñ eki sakini Ukrayina mahsus hızmetlerinen işbirlik yapqanında şübheli sayılıp tutulğanını bildirdi: biri – Arbiy obyektler aqqında malümatnı Ukrayina Baş idaresine berüvde, digeri – Ukrayina Devlet sıñır hızmetinen bağda qabaatlandı.
• Daa evel işğalciler tarafından ukrayin mahsus hızmetleriniñ emrinen sözde ”demiryolunda terakt azırlağanında” qabaatlanğan Keriç sakinini, psihiatrik hastahanege mecburiy tedaviylevge yolladılar.