Er kün işğal etilgen semetdeşlerimiz yarımadanıñ azat etilecegine işançlarını ifadelep, rus işğalcilerine toqtamayıp qarşılıq köstermege devam ete. Er aftalıq #qarşılıq_areketi rubrikamızda adetince Qırımda ukrainlerniñ cesür küreşi ve işğalcilerge qarşılığına dair haberlernen paylaşmağa devam etemiz.  

• İşğal etilgen Qırım sakini Ceppar Seytmamutov içtimaiy ağlarda Ukrainağa qol tutqanı içün işğalciler tarafından tevqif etildi. Yerli sakin rus tilinde yaramay laf etkenine baqmadan, işğalciler onu kamera ögünde afu soramağa zorlağan. Materiallar ise “mahkemege” yiberilgen. 
• İşğal etilgen Aqmescit sakini Sergiy Yeromenko içtimaiy ağlarda rus ordusını mısqıldap, rusiye ve onıñ “prezidentini” yamanlağan. Rus quvetçileri aqaynıñ evinde qanunsız tintüv keçirip, ev saibini tutıp alğanlar. 
• Stanislav Andruşçenko içtimaiy ağlarında rusiyeni, putinni ve işğalci ordusını yamanlağan. İşğalciler onı tevqif etti, iş materialları ise “mahkemege” yiberildi. 
• Yalta sakini Yuriy Fandüşkin, iş yerinde rusiyeni yamanlap, cenkni tenqit etkeni içün qanunsız şekilde işğalciler tarafından tevqif etildi. İş materialları “mahkemege” yollandı, aqaynı ise kamera ögünde afu soramağa zorlağanlar. 
• Keriç sakini Oleksandr Popov içtimaiy ağlarda rusiyeniñ Ukrainağa qarşı tecavuzına qarşı olğanını bildirip, rus ordusını ve devletini yamanlağan. İşğalciler aqaynı tevqif etti. Onı kamera ögünde afu soratqanlar. İş materiallarını ise “mahkemege” yollağanlar.  
• “Jovta striçka” (“Sarı şerit”) areketiniñ faalleri işğalcilerge qarşılığını köstermege devam ​​etip, işğal altındaki Qırımda işğalcilerniñ propaganda materiallarını yoq ete ve Ukrainanı desteklegen materiallarnı tarqatalar. Böyle etip, Ukrainağa qol tutuv plakatları ve sarı şeritler kene Aqmescit, Yalta, Aluşta, Aqyar, Kezlev ve başqa şeerlerde peyda oldı. Ondan da ğayrı, faaller georgiyevskaya şeritlerinen işğalcilerniñ başqa timsallerini yoq etmek içün “İşğalcilerniñ şeritlerini yaq” aktsiysını başlata.  
• “Krımski boyovi çaykı” (“Qırımnıñ cenkâver çağalaları”) faalleri işğal etilgen Qırımda satqınlarnıñ ve işğalcilerniñ şahsiy malümatlarını bildirmege devam ete.
• “Zla Mavka” (“Açuvlı Mavka”) qarşılıq areketiniñ faalleri kündeliklerini alıp barmağa ve işğalcilerniñ cinayetlerini köstergen aftalıq mecmuanı derc etmege devam ete. 
• “ATEŞ” areketiniñ faalleri içtimaiy ağlarda rus propagandasına qarşılıq kösterüv, duşmannıñ informatsiya astyapısına ücüm etüv, işğalciler ve satqınlar aqqında malümat toplav maqsadınen kiber bölük yarata. Bunıñnen beraber, faaller işğal etilgen Aqmescitte cenkke qarşı ve Ukrainağa qol tutuv bildirmeleri yerleştirdi. “ATEŞ” işğal etilgen Aqyardaki arbiy qısımda çalışmağan tehnika anbarınıñ istihbaratını keçirdi. Olarnıñ malümatına köre, ruslar bu anbardaki tehnikanı arbiy maqsatlar içün tamirley. Onıñ yanınd radiolokatsiya sisteması tapıldı. Bütün malümat ve koordinatlar Ukraina silâlı quvetlerine yiberilgen. 

🤬 Qırımnıñ işğalci makemelerinde sözde “rus ordusını itibardan tüşürüv” maddesine köre yañı memuriy davalarnıñ açılması da yarımadadaki qarşılıqnıñ artışını köstere. Mayısnıñ 2-ne qadar vaqtınca işğal etilgen Qırımda, işğalci “makemelerde” ve başqa “kompetentli organlarda” rusiye federatsiyası Memuriy uquq bozuvları kodeksiniñ 20.3.3 maddesine köre protokol tizilgen 780 vaqia qayd etildi. Olar arasında 680 adisede para cezası şeklinde memuriy ceza berilmesi ya da başqa davağa qoşulıp, umumiy tedbir çıqarılması aqqında qarar berildi. 24 adise alâ daa baqıla.🤬

Cesürligiñiz ve vatanperverligiñiz içün sağ oluñız! Qırım – bu Ukraina, ve biz Qırım yarımadasınıñ eñ yaqın zamanda Ukraina terkibine qaytarılması, vaqtınca işğal etilgen topraqlarda yaşağan vatandaşlarımızğa ise havfsızlıq duyğusını temin etmek içün ep birlikte ğayret etemiz.

Ukrainağa şan-şüret!