Er kün işğal etilgen Qırımnıñ sakinleri yarımadanıñ azat etilecegine inanuvlarını ifadelep, rus işğalcilerine toqtamayıp qarşılıq köstermege devam ete. Qırım sakinleri arasındaki içtimaiy ruh aqqında #qarşılıq_areketi rubrikamızda yañı haberlernen paylaşmağa devam etemiz.

İşğal etilgen Sudaqta işğalciler içtimaiy ağlarda rus ordusını ve putinni yamanlağan yazılar paylaşqan bir qadınnı tuttı. Qadınnıñ evinde keçken qanunsız tintüv vaqtında ukrain bayraqları ve timsalâtı tapıldı.

İşğal etilgen Yalta sakini Tetâna Bibik içtimaiy ağlarda işğalci memuriyetlerni ve işğalci ordunı yamanlağan yazılar paylaşqanı içün qanunsız şekilde tevqif etildi. “Dava” materialları “mahkemege” yiberildi, qadınnı kamera ögünde afu soramağa zorladılar.

İşğal etilgen Aqmescitte yerli sakin Nataliya Turta, içtimaiy ağlarda işğalcilerni ve putinni tenqit etkeni, ukrain timsalatı ve yırlarını paylaşqanı, Ukraina Silalı Quvetlerine qol tutqanı içün 5 künge tevqif etilip, 30 biñ ruble cöreme töledi. Qadınnı kamera ögünde afu soramağa zorladılar.

İşğal altındaki Yalta rayonunıñ Partenit qasabası sakini Valeriy Filipov, içtimaiy ağlarda Ukrainağa qoltutqan anonim saife alıp barğanı ve işğalcilerniñ cinayetlerini añlatqanı içün qanunsız olaraq tutuldı. Filipovğa 100 biñ rüble cöreme töletip, 10 künge tevqif ettiler.

İşğalciler Keriç şeerinde Gubskiy Olegni tevqif ettiler. Şeer sakini içtimaiy ağlarda işğalci ordusı ve memuriyetni tenqit etken. Onı apiske yollap, qanunsız şekilde “rusiye silâlı quvetlerini itibardan tüşürüvde” ve sözde LGBT propagandasında qabaatladılar. Gubskiyke 150 biñ ruble cöreme belgilendi.

İşğal etilgen Kefede işğalci quvetçiler sözde “merkez e” ile birlikte qanunsız şekilde yerli sakin Rıbalka Ruslannı tevqif ettiler. Onı, rus işğalci memuriyetini tenqit etkeni içün sözde “ekstremizm çağıruvlarında” qabaatlaylar. İşğalciler cinaiy “dava” açtı, erkek 4 yılğa qadar apis etile bile.

“Jovta striçka” (“Sarı şerit”) areketiniñ faalleri işğalcilerge qarşılığını köstermege devam ​​etip, işğal altındaki Qırımda işğalcilerniñ propaganda materiallarını yoq ete ve Ukrainanı desteklegen materiallarnı tarqatalar. Böyle etip, Ukrainağa qol tutuv plakatları ve sarı şeritler kene Aqmescit, Yalta ve Kefe şeerlerinde peyda oldı. 

“Krımski boyovi çaykı” (“Qırımnıñ cenkâver çağalaları”) faalleri işğal etilgen Qırımda satqınlarnıñ ve işğalcilerniñ şahsiy malümatlarını bildirmege devam ete. Faaller 2000 senesi başlağan ve ukrain yırcıları sayesinde inkişaf etken Yalta Summer Jam festivalini Qırımnıñ işğalinden soñ işğalcilerge “özüne almağa” yardım etken satqınlarnıñ şahsiy malümatlarını tapmağa ve bildirmege devam ete. 

“Zla Mavka” (“Açuvlı Mavka”) qarşılıq areketiniñ faalleri “Qırım – Ukraina” olğanını ve işğalcilerniñ Qırımda istenilmegenini hatırlatqan “yañı” kupüralar ve vatanseverlik stikerleri tarqattı. Ondan da ğayrı, faaller kündeliklerini alıp barmağa ve işğalcilerniñ cinayetlerini köstergen aftalıq mecmuanı derc etmege devam ete. 

“ATEŞ” areketiniñ faalleri işğal etilgen yarımadada ava mudafaa sistemalarınıñ artmasını qayd ete. Faaller rus komandanlığınıñ mümkün olğan yollarnen Qırımdaki müim arbiy obyektlerni qapatmağa tırışqanını, amma ava mudafaa sistemalarınıñ kritik seviyede yetmegenini bildirdi. Ondan da ğayrı, “ATEŞ” rusiyeniñ Qara deñizde arbiy yüklerni taşımaq içün armiyolmağan gemilerni qullanğanı aqqında malümat berdi. Aynı zamanda faaller işğal etilgen Canköy şeerine pek çoq asker ketirilgenini qayd ete. Rus istilâcılarnıñ pek çoq ğayıpları olğanı içün kreml bu ğayıplarnı ivaz etmek içün qanunsız şekilde gizli seferberlik keçire. Neticede işğalciler cebege yiberilmek içün işğal etilgen Canköyge ketirile. Bundan da ğayrı, “ATEŞ” faalleriniñ malümatına köre, arbiy ve arbiyolmağan hastahaneler cebeden ketirilgen yaralı işğalcilernen tolu. Onıñnen beraber faaller Aqyarda işğalcilerniñ Qara deñiz flotuna ait maddiy-tehnikiy teminat bazasını tapıp oldı, bütün malümat Ukraina Silâlı Quvetlerine bildirildi.

🤬 Qırımnıñ işğalci makemelerinde sözde “rus ordusını itibardan tüşürüv” maddesine köre yañı memuriy davalarnıñ açıkması da yarımadadaki qarşılıqnıñ artışını köstere. Aprelniñ 4-ne qadar vaqtınca işğal etilgen Qırımda, işğalci “makemelerde” ve başqa “kompetentli organlarda” rusiye federatsiyası Memuriy uquq bozuvları kodeksiniñ 20.3.3 maddesine köre protokol tizilgen 737 vaqia qayd etildi. Olar arasında 641 adisede para cezası şeklinde memuriy ceza berilmesi ya da başqa davağa qoşulıp, umumiy tedbir çıqarılması aqqında qarar berildi. 20 adise alâ daa baqıla.🤬

Cesürligiñiz ve vatanperverligiñiz içün sağ oluñız! Qırım – bu Ukraina, ve biz Qırım yarımadasınıñ eñ yaqın zamanda Ukraina terkibine qaytarılması, vaqtınca işğal etilgen topraqlarda yaşağan vatandaşlarımızğa ise havfsızlıq duyğusını temin etmek içün ep birlikte ğayret etemiz.

Ukrainağa şan-şüret!