İşğal etilgen Qırımda yaşağn semetdeşlerimiz yarımadanıñ azat etilecegine işançlarını ifadelep, rus işğalcilerine toqtamayıp qarşılıq köstermege devam ete. Er aftalıq #qarşılıq_areketi rubrikamızda adetince Qırımda ukrainlerniñ cesür küreşi ve işğalcilerge qarşılığına dair haberlernen paylaşmağa devam etemiz.  

• İşğal etilgen Kezlev sakini avtobus toqtav yerinde rus arbiylerini işğalciler dep yamanlağan ve ruslarnı işğal etilgen Qırımğa kelmemege ve rusiyede qalmağa çağırğan. Qadınnı tevqif etip, kamera ögünde afu soramağa zorlağanlar, materiallarnı ise “makemege” yollağanlar.

• İşğalciler Ukraina Telükesizlik Hızmetinen sözde yazışmalar ve Ukraina Silalı Quvetlerinde sanki hızmet etmek istegeni içün 44 yaşındaki Yalta sakinini 5 yılğa mahküm ettiler. Sakni o, dostınen beraber messenjerler vastasınen Ukraina Silalı Quvetlerine Qırımdaki rus askerleri aqqında malümat yibere ve işğal etilgen yarımadada rus arbiy obyektlerinde diversiyalar keçirmege azır olğanını bildire eken.
• “Jovta striçka” (“Sarı şerit”) areketiniñ faalleri işğalcilerge qarşılığını köstermege devam ​​etip, işğal altındaki Qırımda işğalcilerniñ propaganda materiallarını yoq ete ve Ukrainanı desteklegen materiallarnı tarqatalar. Böyle etip, Ukrainağa qol tutuv plakatları ve sarı şeritler kene Aqmescit, Aqyar ve Yaltada peyda oldı.
• “Krımski boyovi çaykı” (“Qırımnıñ cenkâver çağalaları”) faalleri işğal etilgen Qırımda satqınlarnıñ ve işğalcilerniñ şahsiy malümatlarını bildirmege devam ete.
• “Zla Mavka” (“Açuvlı Mavka”) qarşılıq areketiniñ faalleri kündeliklerini alıp barmağa ve işğalcilerniñ cinayetlerini köstergen aftalıq mecmuanı derc etmege devam ete. Bundan da ğayrı, faaller işğal etilgen Aqmescitte Ukrainağa qol tutuv varaqaları tarqatqan.
• “ATEŞ” areketiniñ faalleri Aqyardaki Hersonen uçaq alanınıñ istihbaratını keçirdi. Olar, blindajlar ve o bölgeni nezaret etken rus arbiylerini belgiledi. Nezaret vaqtında ayrıca “Raptor” adlı rus patrul gemisi de qayd etildi, bu ise obyektniñ yüksek seviyede qorçalanğanını köstere. Bundan da ğayrı, “ATEŞ” soñki vaqıtlarda işğalcilerniñ pek tez şeerlerden keçip, anda qalmağanlarını, işğal etilgen yarımada sakinleriniñ körmesinden ve fotoresim çekmelerinden qaçınğanlarına diqqat çeke. Bunıñnen beraber, faaller işğal etilgen Kezlevde işğalcilerniñ yañı ateş noqtalarını tapıp oldı, böyle noqtalarnıñ sayısı da ket-kete artqanını bildireler. Eski noqtalarnı ise işğalciler faal sürette yañarta ve quvetleştire, bu da cebede vaziyetniñ eñ yaramay stsenariyine azırlanğanlarına ve Qırımğa Ukraina arbiyleriniñ ihtimal kirmesini beklegenlerine işaret ete.

Qırımnıñ işğalci makemelerinde sözde “rus ordusını itibardan tüşürüv” maddesine köre yañı memuriy davalarnıñ açılması da yarımadadaki qarşılıqnıñ artışını köstere. İyünniñ 20-ne qadar vaqtınca işğal etilgen Qırımda, işğalci “makemelerde” ve başqa “kompetentli organlarda” rusiye federatsiyası Memuriy uquq bozuvları kodeksiniñ 20.3.3 maddesine köre protokol tizilgen 847 vaqia qayd etildi. Olar arasında 755 adisede para cezası şeklinde memuriy ceza berilmesi ya da başqa davağa qoşulıp, umumiy tedbir çıqarılması aqqında qarar berildi. 10 adise alâ daa baqıla. Ondan da ğayrı, 309 qarar (41%) qadınlarğa qarşı, 446 da (59%) erkeklerge köre çıqarıldı. Umumiy olaraq, berilgen cöremelerniñ miqdarı endi eñ az 23.7 mln rus rublesini teşkil etmekte.

Cesürligiñiz ve vatanperverligiñiz içün sağ oluñız! Qırım – bu Ukraina, ve biz Qırım yarımadasınıñ eñ yaqın zamanda Ukraina terkibine qaytarılması, vaqtınca işğal etilgen topraqlarda yaşağan vatandaşlarımızğa ise havfsızlıq duyğusını temin etmek içün ep birlikte ğayret etemiz.

Ukrainağa şan-şüret!