İşğal etilgen Qırımda yaşağan semetdeşlerimiz vaqtınca işğal altındaki yarımadanıñ serbest olacağına inancını kösterip, er kün yorulmadan rus işğalcilerine qarşılıq köstere. Adetince, er aftalıq #qarşılıq_areketi rubrikamızda Qırım sakinleri tarafından kelmeşeklerge qarşı kösterilgen cesaretli küreş ve tirenüv aqqında haberlernen paylaşmağa devam etemiz.

• Aqmescitte yerli sakin qanunsız “vladimir putin saylavlarında” narazılığını köstermek içün bülleten qutusına zelönka tökti. İşğalciler qadınğa qarşı cinayet davası açtı.
• İşğalciler Qırımda, askerlik tehnikasınıñ areket etmesine mania olmaq içün demiryol stantsiyasında sözde yanğın çıqaracaq olğan qadınnı qanunsız şekilde tevqif etti. İşğalciler qadınğa qarşı sözde terroristik eylem azırlağanı sebebinden cinaiy “dava” açtı. 
• İşğal etilgen Aqyarda keçirilgen qanunsız saylavlar vaqtında bülletenge “Cenk olmasın, Ukrainağa barışıq” dep yazğan 18 yaşında bir oğlannı tuttılar. Yigitke “rusiye ordusını itibardan tüşürüv” maddesine köre ceza kesile bilir. 
• Keriçte işğalci quvetçiler qanunsız “vladimir putin saylavlarında” rey bereyatqanda bülleteninde ukrain simvolikasınen resim yapqan, ondan soñra ise bunı işğalcilerden gizlemek içün onı yutqan aqaynı yaqaladılar. İşğalciler yerli sakinni “teşkermege” başladılar. 
• Rus işğalcileri Aqyar sakinini sözde “terakt” azırlağanı içün yaqaladılar. İşğalcilerniñ sözlerine köre, yaqalanğan adam martnıñ 11-nde Kozaçya soqağında bir evniñ kirişi yanında gaz borusına patlama aleti qoyğan. İşğalciler patlama dalğasınen sanki bir rus askeriniñ yaşağan evine zarar ketirilmesi planlaştırılğanını iddia etti. İşğalciler aqayğa qarşı cinaiy “dava” açtılar, onı, qanunsız şekilde 20 yılğa qadar apis müddetinen cezalamaq isteyler. 
• İşğalciler Aqmescit rayonunıñ Badana köyünde yaşağan yerli sakinYaroslav Boyko’nı yaqaladılar. O, içtimaiy ağlarında “Qırım – Ukraina” yazılarını yayınlap, Ukraina Silâlı Quvetlerini beklegenini bildirgen. Erkekni 15 künge tevqif etkenler, aqqındaki “materiallarnı” ise işğalci memuriyet sözde “mahkemege” yollağan.
• Qırımnıñ sözde “sıñır idaresi” ve sözde “e merkezi” içtimaiy ağlarda putinge ve işğalci rus ordusına qarşı şeyler yazğan, Ukraina Silâlı quvetlerini ve Ukraina topraq bütünligini desteklegen Ştefan Veronikanı tuttı. Al-azırda işğalciler qadınnı qanunsız şekilde 10 künge tevqif etti, oña qarşı üç qanunsız “protokol” tizildi. Ondan da ğayrı, qadınnı kamera ögünde afu soramağa zorladılar.
• İşğalciler iştimaiy ağlarda Qırımnı Ukrainanıñ parçası olaraq işaretlegen ve ukrain yırlarını paylaşqan yerli sakinni qanunsız şekilde yaqaladı. İş “materialları” işğalci “mahkemege” yiberilgen, qıznı da kamera ögünde afu soramağa mecbur etkenler.
• “Jovta striçka” (“Sarı şerit”) areketiniñ faalleri narazılıq aktsiyalarını keçirmege devam ​​etip, işğal altındaki Qırım şeerlerinde işğalcilerniñ propaganda materiallarını yoq ete ve Ukrainanı desteklegen materiallarnı dağıta. Böyle etip, Ukrainağa qol tutuv plakatları ve sarı şeritler Qırım MC Yuqarı Şurasınıñ yanında ve Saq şeeriniñ merkezinde peyda oldı. 
• “Krımski boyovi çaykı” (“Qırımnıñ cenkâver çağalaları”) faalleri işğal etilgen Qırımda qanunsız “saylavlarnı” teşkil etken satqınlarnıñ şahsiy malümatlarını bildirmege devam ete. 
• “Zla Mavka” (“Açuvlı Mavka”) qarşılıq areketi işğalciler içün “Qırım – Ukraina” olğanını hatırlatqan kupüra çıqardı. Faaller kündeliklerini alıp barmağa ve işğalcilerniñ cinayetlerini köstergen aftalıq mecmuanı derc etmege devam ete. 
• “ATEŞ” faalleri Anğarada rus flotunıñ 126-ncı ayrı yalı muafaza brigadasınıñ yerleşüv yerini tapıp oldı. Faaller, arbiy qısımnıñ yanında çoq asker bulunğanını, olardan çoqusınıñ yerli olmağanını, aktsenetleri ve formalarındaki simvolikanıñ farqlı olğanını belgiledi. Bundan ğayrı, “ATEŞ” Canköyge şarq arbiy okrugından, ihtimal novosibirskten işğalcilerniñ ketirilmesini qayd etti. 

🤬 Qırımnıñ işğalci makemelerinde sözde “rus ordusını itibardan tüşürüv” maddesine köre yañı memuriy davalarnıñ açıkması da yarımadadaki qarşılıqnıñ artışını köstere. Martnıñ 21-ne qadar vaqtınca işğal etilgen Qırımda, işğalci “makemelerde” ve başqa “kompetentli organlarda” rusiye federatsiyası Memuriy uquq bozuvları kodeksiniñ 20.3.3 maddesine köre protokol tizilgen 699 vaqia qayd etildi. Olar arasında 612 adisede para cezası şeklinde memuriy ceza berilmesi ya da başqa davağa qoşulıp, umumiy tedbir çıqarılması aqqında qarar berildi. 11 adise alâ daa baqıla.🤬

Cesürligiñiz ve vatanperverligiñiz içün sağ oluñız! Qırım – bu Ukraina, ve biz Qırım yarımadasınıñ eñ yaqın zamanda Ukraina terkibine qaytarılması, vaqtınca işğal etilgen topraqlarda yaşağan vatandaşlarımızğa ise havfsızlıq duyğusını temin etmek içün ep birlikte ğayret etemiz.

Ukrainağa şan-şüret!