Er kün işğal etilgen topraqlarda yaşağan semetdeşlerimiz yarımadanıñ azat etilecegine işançlarını ifadelep, rus işğalcilerine toqtamayıp qarşılıq köstermege devam ete. Er aftalıq #qarşılıq_areketi rubrikamızda adetince Qırımda ukrainlerniñ cesür küreşi ve işğalcilerge qarşılığına dair haberlernen paylaşmağa devam etemiz.  

• Aqyar sakini içtimaiy ağlarda işğalcilerni tenqid etken tefsizler yazğan. İşğalciler adamnı tutıp aldılar, oña cöreme belgilenmesi beklenile.
• Kefe rayonınıñ Qapsihor köyüniñ sakinleri, eki ağa-qardaşlar içtimaiy ağlarda Ukraina Silâlı Quvetlerini beklegenini bildirgen. İşğalciler ağa-qardaşnı tevqif ettiler, sözde “mahkeme” qararına köre olarnı 15 künge izolâtorğa yolladılar.
• Aqyar sakini şeerniñ yalılarından birinde vatanperverlik şiarlarını, hususan “Ukrainağa şan-şüret, qaramanlarğa şan-şüret” şiarını seslendirgen. İşğalciler adamnı tutıp aldı, sözde “mahkeme” onı qabaatlı dep tanıdı.
• Kefe rayonınıñ Suvuq Suv köyüniñ sakini içtimaiy ağlarda qırımtatar halqınıñ Meclisine qol tuttı ve Ukraina Silâlı Quvetlerni beklegenini bildirdi. İşğalciler adamnı tevqif etti.
• “ATEŞ” qarşılıq areketiniñ faalileri Aqyarda arbiy obyektlerniñ ve Kezlev demiryol vokzalında işğalcilerniñ tehnikasınıñ istihbaratını keçirdi.
• “Jovta striçka” (“Sarı şerit”) areketiniñ faalleri işğalcilerge qarşılığını köstermege devam ​​etip, işğal altındaki Qırımda işğalcilerniñ propaganda materiallarını yoq ete ve Ukrainanı desteklegen materiallarnı tarqatalar. Böyle etip, Ukrainağa qol tutuv plakatları ve sarı şeritler Aluşta, Yalta, Aqmescit ve Aqyar şeerlerinde peyda oldı.
• “Krımski boyovi çaykı” (“Qırımnıñ cenkâver çağalaları”) faalleri işğal etilgen Qırımda satqınlarnıñ ve işğalcilerniñ şahsiy malümatlarını bildirmege devam ete.
• “Zla Mavka” (“Açuvlı Mavka”) qarşılıq areketiniñ faalleri kündeliklerini alıp barmağa ve işğalcilerniñ cinayetlerini köstergen aftalıq mecmuanı derc etmege ve öz timsalâtını tarqatmağa devam ete. 

Qırımnıñ işğalci makemelerinde sözde “rus ordusını itibardan tüşürüv” maddesine köre yañı memuriy davalarnıñ açılması da yarımadadaki qarşılıqnıñ artışını köstere. İyülniñ 23-ne qadar vaqtınca işğal etilgen Qırımda, işğalci “makemelerde” ve başqa “kompetentli organlarda” rusiye federatsiyası Memuriy uquq bozuvları kodeksiniñ 20.3.3 maddesine köre protokol tizilgen 913 vaqia qayd etildi. Olar arasında 811 adisede para cezası şeklinde memuriy ceza berilmesi ya da başqa davağa qoşulıp, umumiy tedbir çıqarılması aqqında qarar berildi. 18 adise alâ daa baqıla.

Cınısqa köre qadınlarğa qarşı 337 (42%), erkeklerge qarşı ise 473 (58%) qarar çıqarıldı. Umumen, berilgen cöremelerniñ umumiy miqdarı endi eñ azdan 26,4 million rus rublesini teşkil ete.

Cesürligiñiz ve vatanperverligiñiz içün sağ oluñız! Qırım – bu Ukraina, ve biz Qırım yarımadasınıñ eñ yaqın zamanda Ukraina terkibine qaytarılması, vaqtınca işğal etilgen topraqlarda yaşağan vatandaşlarımızğa ise havfsızlıq duyğusını temin etmek içün ep birlikte ğayret etemiz.

Ukrainağa şan-şüret!