İşğal etilgen Qırımnıñ sakinleri er kün Ukraina tarafdarlığını köstermek içün cesaretnen, yorulmadan rus işğalcilerine qarşılıq köstere. Qırım sakinleri arasındaki içtimaiy ruh aqqında #qarşılıq_areketi rubrikamızda yañı haberlernen paylaşmağa devam etemiz.

• Sudaq rayonunıñ Suvuq Sala qasabasında işğalciler mektepte oca olıp çalışqan bir qadınnı tuttı. Yerli sakin İnstagram saifesinde Ukraina temsillerini, bayrağını ve “Ukrainağa şan-şüret” yazısını paylaşqan. Qadınnı kamera ögünde afu soratıp, mektepten işten çıqarğanlar.
• İşğalciler vaqtınca işğal etilgen Qırım sakinini yaqaladı. Aqay, içtimaiy ağlarda sanki “rus ordusını itibardan tüşürgen”, putin aqqında yaramay şeyler yazğan ve cenkke qarşı çıqqan eken. “Dava” materialları “mahkemege” yiberilgen.
• İşğal etilgen Bağçasarayda içtimaiy ağlarda işğalci akimiyetni tenqit etken, Ukraina Silâlı Quvetlerini desteklegen ve Ukraina topraq bütünligine qol tutqan yerli sakinni tutıp aldılar. Aqaynı kamerağa çekip, afu soratqanlar ve “dava” materiallarını “mahkemege” yollağanlar.
• İşğalciler işğal etilgen Aqmescit sakinini Yanük Dmıtronı yaqaladı. O, içtimaiy ağlarında “Qırımlı Volânın” lağabı altında işğalcilerni ve işğalci memuriyetni yamanlap, Ukraina topraq bütünligini desteklegen ve Ukraina Silâlı Quvetlerini beklegenini bildirgen. Erkekni videoğa çekip, afu soratqanlar. “Materiallar” sözde “mahkemege” yiberilgen, al-azırda cinaiy “dava” açılması aqqında qarar çıqarılması beklene.
• Yalta rayonunda işğalciler sözde “putin seçimlerinden” soñ yerli sakinlerge basqı kösterilmege başladı. Böyle etip, işğal etilgen Simeizniñ işğalci “mahkemesi” bülletende Ukrainanı beklegenini yazğan bir yerli sakinni yaqaladı.
• “Jovta striçka” (“Sarı şerit”) areketiniñ faalleri narazılıq aktsiyalarını keçirmege devam ​​etip, işğal altındaki Qırım şeerlerinde işğalcilerniñ propaganda materiallarını yoq ete ve Ukrainanı desteklegen materiallarnı dağıta. 
• “Krımski boyovi çaykı” (“Qırımnıñ cenkâver çağalaları”) faalleri işğal etilgen Qırımda satqınlarnıñ ve rus işğalci cinayetçilerniñ şahsiy malümatlarını bildirmege devam ete. 
• “Zla Mavka” (“Açuvlı Mavka”) qarşılıq areketi kündeliklerini alıp barmağa ve işğalcilerniñ cinayetlerini köstergen aftalıq mecmuanı derc etmege devam ete. 
• “ATEŞ” areketiniñ faalleri işğalcilerniñ Kezlevge 31 rus tankı ketirgenini qayd etti. Ondan da ğayrı, faaller işğal etilgen Canköy şeeriniñ uçaq alanında uçaqquvar-raketa kompleksleriniñ artışı aqqında bildire. Bunıñnen beraber, faaller işğalci askerler içün azıq malları, arbiy formalar ve çadırlarnıñ saqlanılması içün qullanılğan anbarlarnı qıdırıp tapqan. Episi malümat ve koordinatlar Ukraina Mudafaa Quvetlerine bildirilgen.

Qırımnıñ işğalci makemelerinde sözde “rus ordusını itibardan tüşürüv” maddesine köre yañı memuriy davalarnıñ açıkması da yarımadadaki qarşılıqnıñ artışını köstere. Aprelniñ 4-ne qadar vaqtınca işğal etilgen Qırımda, işğalci “makemelerde” ve başqa “kompetentli organlarda” rusiye federatsiyası Memuriy uquq bozuvları kodeksiniñ 20.3.3 maddesine köre protokol tizilgen 737 vaqia qayd etildi. Olar arasında 641 adisede para cezası şeklinde memuriy ceza berilmesi ya da başqa davağa qoşulıp, umumiy tedbir çıqarılması aqqında qarar berildi. 20 adise alâ daa baqıla.

Cesürligiñiz ve vatanperverligiñiz içün sağ oluñız! Qırım – bu Ukraina, ve biz Qırım yarımadasınıñ eñ yaqın zamanda Ukraina terkibine qaytarılması, vaqtınca işğal etilgen topraqlarda yaşağan vatandaşlarımızğa ise havfsızlıq duyğusını temin etmek içün ep birlikte ğayret etemiz.

Ukrainağa şan-şüret!