İyülniñ 15-nde peyda olğan malümatqa köre, siyasiy mabüs Amethan Abdulvapov irkutsk vilâyetiniñ angarsk şeerindeki 2-ncı koloniyağa etap etilmesi vaqtında insult keçirdi, koloniya hadimleri oña kerekli tıbbiy yardım kösterilmesini red etkenleri içün mabüs insultnı ayaqta keçirdi. Faallerniñ qorantası bu aqta onıñ mektübından haber aldı.
Siyasiy mabüsniñ babası Necip Abdulvapov, oğlunıñ iç bir vaqıt yürek raatsızlığı olmağanını qayd etti, şunıñ içün insulttan evel koloniya hadimleriniñ mabüske nisbeten zorbalıq yapqanları tüşünile.
2022 senesi fevralniñ 9-nda Rusiye hızmetleri Amethan Abdulvapovnı Hizb ut-Tahrir siyasiy firqasınıñ faaliyetine alâqası olğanında qabaatlap tuttı, 2023 senesi martnıñ 15-nde Cenübiy okrugınıñ arbiy mahkemesi faalge on yıl ve altı ay apis cezasını berdi. Daa evel aqay, tişlerinde ağrılar, basım ve şişiklikke şikâyet ete edi, amma oña tibbiy yardım berilip berilmegeni, belli degil, çünki etap vaqtında Amethannen alâqa olmadı.
Amethan Abdulvapovdan ğayrı, iyül ayınıñ devamında onlarnen siyasiy mabüsniñ sağlıq vaziyeti fenalaşqanı aqqında bildirilgen edi. Şaban Ümerov, Rustem Seitmemetov, Cebbar Bekirov, Yaşar Müedinov, Arsen Abhairov, Emil Cemadenov, Amet Suleymanov kibi mabüsler de tedaviylev alamağan qırımlılar cedvelinde yer almaqta. Rusiye memurları mabüslerniñ tibbiy yardım aqqını red etkeni içün olarnıñ vaziyeti kün-künden beterleşe. Mahkümlerniñ eñ sıq şikâyetleri – diş problemleri, varikoz, yüksek basım ve yürek hastalıqları. Aslında, ruslar siyasiy mabüslerniñ sağlıq vaziyetini ve tedaviylev ihtiyaclarını körmemezlikke urıp, olarnıñ ölümini yavaş-yavaş yaqınlaştıralar.
Rusiyeniñ apishanelerinde yaramay tutuluv şaraitleri ve tibbiy yardımnıñ yoqluğı siyasiy mabüslerniñ ölümine ket-kete sebep ola. Böylece, soñki yılları esirlikte Cemil Ğafarov, Kostantin Şiring, Rustem Virati ve digerleri vefat etti.
Şimdi apislerde eñ azından 60 insan ağır alda buluna ve acele tedaviylevge muhtaclar. Dünya toplulığını siyasiy mabüslerniñ tutuluv şaraitleriniñ bozuluvına, tibbiy yardım ve ilâclarnıñ yetmemezligine diqqat etmege çağıramız.