Tamila Taşeva Ukraina Prezidentiniñ Qırım Muhtar Cumhuriyetindeki Daimiy Temsilcisiniñ muavini vazifesine tayin etilgeni aqqında quvançnen haber etemiz.
Tamila Taşeva, 2014 senesinden berli BMT Qaçaqlar meseleleri boyunca Aqrusiyede, Moldovada ve Ukrainada Yuqarı Komisarı Temsilciliginiñ memleket içinde köçken şahıslarnı qorçalav boyunca leyhalarınıñ ortağı olğan ve yerine ketirgen ”QırımSOS” cemaat teşkilâtınıñ teşkilâtçısı ve idare başlığıdır.
O, aq qorçalav areketiniñ faalcisi ve yaş qırımtatar nesiliniñ liderlerinden biridir. Tamila Taşeva memleket içinde köçken şahıslarnıñ meselelerini çezüv, Qırımda insan aqları saasında vaziyet, aq qorçalav faaliyeti, içtimaiy saada ukrain qanuniyetini inkişaf etüv ve bu cümleden vaqtınca işğal etilgen topraqlarğa dair gumanitar uquq ile faal şekilde oğraşa.
Tamila hanım cemaatçılıq saasında büyük tecribege maliktir. Qırımnı ilhaq etmek ıntıluvlardan da evel Tamila Taşeva qırımtatar halqınıñ medeniyetini tanıtqan ve Ukrainada grajdanlıq cemiyetini inkişaf etken bir sıra medeniy, tasil ve içtimaiy leyhalarnı yerine ketirdi. Maydan vaqıtında Tamila Taşeva göñülli olaraq faaliyet kösterdi.
Tamila hanımğa Temsilcilikniñ faaliyetine öz issesini qoşmağa razı olğanı içün teşekkür etemiz ve Qırımnı qaytaruv içün küreşmege azır olğan, teşebbüsli ve tecribeli insanlarımız artqanına quvanamız.