Ukraina Prezidenti Petro Poroşenko İstanbulda Ukraina Ortodoks kilisesiniñ mustaqilligi aqqında Tomosnı Ekümenik Patrigi Varfolomey tarafından imzalav merasiminde iştirak etti. Tantanalı tedbir Aya Yorgi Patrikhane Kilisesinde keçti.
İmzalav merasiminden soñ Ukraina devletiniñ Başlığı tedbirde bulunğanlarğa ve iştirak etkenlerge muracaat etti: ”İtibarlı Patrik efendi, ürmetli hanım ve efendiler. Bizni bügün Ukrainadan ve bütün dünyadan seyir etken ve bu vaqianı biñ yıllar devamında beklegen aziz ukrainalılar. Tañrığa şükürler olsun! Çünki Tañrınıñ ruhseti olmağance, bu vaqia imkânsız edi”.
”İtibarlı Ekümenik Patrigi Varfolomeyge iradesi içün büyük minnetdarlığımnı bildirem. İtibarlı efendi, bu elçırpmalar şimdi bütün dünyada yanğıray”, – dep ayttı Petro Poroşenko.
Prezident Ekümenik Patrigi Varfolomeyge Ukrainanı sevgeni, Ukrainağa inanğanı, Ukraina ve ukrain halqı içün duva oquğanı, bütün ömüri devamında ve hususan Büyük bazarertesi kününden, yani 2018 senesi Pasha bayramından soñ birinci kününden başlap, yani Ukraina Ortodoks Kilisesini teşkil etüv ceryanı devamında numayış etken mertligi üçün teşekkür etti.
”Aziz Sinodğa, Ekümenik patrikhanesiniñ meclisine, Ekümenik Patrigi adına Ukraina Ortodoks Kilisesiniñ mustaqilligi aqqında muracaatnı imzalağan er bir yepiskopqa minnetdarlığımnı bildirmege isteyim”, – dep qayd etti Prezident.
Devletimizniñ Başlığı Ukraina Yuqarı Şurasına ve Parlament reisi Andriy Parubiyge, Ekümenik Patrigi adına Ukraina Ortodoks Kilisesiniñ mustaqilligi aqqında Prezidentniñ muracaatını imzalağan er bir deputatqa minnetdarlıq sözlerini bildirdi.
”Ve eñ muimi – bütün dünyada yaşap, bu kiliseniñ teşkil etilüvi içün duvalar etken millionlarnen ukrainalılarğa minnetdarlığımnı bildirmege isteyim. Bu vaqia duvalarıñız sayesinde mümkün oldı”, – dep ayrıca qayd etti Petro Poroşenko.
O, bu vaqianı ya 1030 yıl, ya da 332 yıl ya da 100 yıl devamında beklegen ukranalılar nesillerine minnetdar olğanını ayrıca qayd etti. ”Tañrı bizge niayet Ukraina Ortodoks Kilisesini bağışladı”, – dep qayd etti Petro Poroşenko.
Prezident bu meselede qıymeti yüksek ğayretlerini köstergen Patrikniñ vekillerine bildirilgen minnetdarlıq sözlerine de qoşuldı.
Tomosnı imzalav merasiminden soñ Azretli Ekümenik Patrigi Varfolomey Kıyiv ve bütün Ukraina Mitropoliti Yepifaniyge muracaat etti: ”İtibarlı efendi, kiliseñizniñ mustaqilligini talap etmege aqqıñız bar edi. Konstantinopoldeki Ana kiliseñizniñ ise sizge bu mustaqillik statusını bağışlamağa aqqı bardır. Bu bahşışqa lâyıq olmañız ve ortodoks birlikte, umumiy faaliyette ve ortodoks inançınıñ tükenmez baylıqlarını arzu etken zemaneviy dünyada başqa qardaş kiliselerniñ yoldaşı olmañız içün can-yürekten duvalar etecekmiz”.
Ekümenik patrigi qayd etkenine köre, ”Tañrınıñ iradesi üzerine biz şimdi siziñ (muarriyetten ”ukrain”) toprağıñızda qabaatları olmadan qanuniy birlik ve munasebetlerden marum qalğan millionlarnen iman etkenlerniñ birdemligini ğayrıdan tikleymiz”.
O, Konstantinopoldeki Kilise olarnı ”ögey ana degil de, aqiqiy ana kibi toplap quçaqlağanını” qayd etti. Ve aynı bu kilise olarnı qadimiy zamanlarda vaftiz merasimine alıp ketken edi”. Ekümenik Patrigi Konstantinopol er vaqıt ”öz balalarınıñ isteklerine ve menfaatlarına hızmet etmek içün areket etkenini” hatırlattı.
”İtibarlı efendi, aziz qardaşım. Bu acayip tarihiy künde Ortodoks inançınıñ Muqaddes Merkezinde bizim ile beraber knâz Volodımır ve aziz Olğa, meşur ukrain toprağınıñ bütün aziz mirasçıları ve Siziñ açıq-aydın aqlarıñıznıñ, ukrain halqınıñ aqlarınıñ ve bütün adamlar ve milletler içün diniy serbestliklerniñ bütün qorçalaycıları turıp, bu vaqianı qayd eteler. Olarnıñ episi duva ruhında mevcüt olıp, bizim quvançımıznı ve memnüniyetimizni paylaşalar”, – dep bildirdi Ekümenik Patrigi Kıyiv ve bütün Ukraina Mitropoliti Yepifaniyge.
Kıyiv ve bütün Ukraina Mitropoliti Yepifaniy öz nevbette Tomosnı imzalağan Patrik Varfolomeyge öz minnetdarlığını bildirip, Ukraina Ortodoks Kilisesi bu Tomosnı sabırsızlıqnen ve eyecannen beklegenini haber etti.
“Bundan ğayrı, Ukraina Prezidenti ve onıñ ile beraber ya da onıñ reberiyetinde bulunıp, ukrain ortodoks din ve inanğanlar nesilleriniñ arzularını yerine ketirip, yekâne yerli mustaqil ortodoks kilisesini teşkil etmege yardım etkenlerge öz minnetdarlığımnı bildirmege isteyim. Prezident efendi, adıñız Ulu Volodımır, İkmetli Yaroslav, Ostroglı Konstantin ve getman İvan Mazepa kibi şhıslarnıñ adları ile beraber ebediyen ukrain halqınıñ ve kilisesiniñ tarihinde qalacaqtır”, – dep ayttı o.