İşbu qararname vastasınen AHİT Parlament Assambleyasınıñ Rusiye Federatsiyasına talapları:

• qanunsız Qırım işğalini toqtatmaq, vaqtınca işğal etilgen Qırım yarımadasından ordusını, silâsını ve arbiy tehnikasını çıqarmaq, yarımadada ordusına çağıruvnı toqtatmaq ve 2021 senesi çiçek ayında kütleviy RF arbiy talimatları esnasında Qırımğa ve Qırım civarındaki deñiz suvlarına köçürilgen qoşma ordusını, silâsını, arbiy tehnikasını ve gemilerini deral çıqarmaq;
• ”Ğarp-2021” kütleviy arbiy talimatlarınıñ arfesinde 2011 senesi imzalanıp, ordu areketleriniñ açıqlığını ve şeffaflığını talap etken Viyana vesiqası boyunca mecburiyetlerini yerine ketirmek;
• halqara uquq şartlarına ve şu cümleden 1982 senesi qabul etilgen BM Deñiz uquqı Qararnamesine binaen, Qara ve Azaq deñizlerinde ve Keriç boğazında deñizcilik serbestliginen bağlı bütün sıñırlamalarnı lâğu etmek, Qara deñizniñ bazı rayonlarında, şu cümleden Keriç boğazı etrafındaki sıñırlamalarğa dair qararını lâğu etmek.

Bundan ğayrı, AHİT PA vaqtınca işğal etilgen Qırımda havfsızlıq ceeten vaziyetni nezaret etmek, hususan qanunsız arbiy areketler ve orduğa çağıruv kampaniyaları, Azaq ve Qara deñizlerindeki ukrain limanlarina irişimniñ sıñırlanması aqqında muntazam sürette maruzalarını taqdim etmek, bütün AHİT vastalarını ve ceryanlarını ve şu cümleden vekâletleri bütün Ukraina topraqlarında üküm sürgen Mahsus Nezaret etici Missiyasını işletmek qararına qol tuttı.

Böyleliknen Ukrainanıñ topraq bütünligine ve egemenligine halqara qol tutuv bir kere daa numayış etildi. Bu tedbirniñ bütün iştirakçilerine minnedarlığımıznı bildirip, Rusiye Federatsiyasını AHİT Parlament Assambleyasınıñ qararnamesini yerine ketirmege ve şu cümleden vaqtınca işğal etilgen Qırım Muhtar Cumhuriyeti ve Aqyar şeeri topraqlarına AHİT Mahsus Nezaret etici Missiyasını kirsetmege çağıramız.