Bügün Ukraina Prezidentiniñ Qırım Muhtar Cumhuriyetindeki Temsilcilik taqımı Kanada devletiniñ Ukrainada Fevqulâde ve Tolu Vekâletli Elçisi Larısa hanım Ğaladza ile körüşti.

Körüşüvde Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç, onıñ muavinleri Darya Svırıdova ve Tamila Taşeva iştirak ettiler.

Körüşüvde vaqtınca işğal etilgen Qırımda insan aqlarınıñ bozuluvı meselesi, işğalci ”organlar” tarafından areket serbestliginiñ sıñırlanması, mülkiyet aqlarınıñ bozulması, Ukrain kilisesine qarşı basqı ve tamır qırımtatar halqınıñ aq-uquqlarını bozuv meseleleri muzakere etildi. Körüşüvde muzakere etilgen müim meselelerden biri, sanktsiyalar tertibi meselesi, Ukraina ortaqları tarafından sanktsiyalar cedvelini kenişletüv ve 2014 senesi saban (mart) ayında BM Baş Assambleyasınıñ qararında qayd etilgen tanımamazlıq siyasetini devam etüvdir. 

Ayrıca keçici devirde adalet kontseptsiyasınıñ Ukrainada milliy şekili ve işbu yönelişte alıp barılğan faaliyet muzakere etildi.

Ukraina Prezidentiniñ Qırım Muhtar Cumhuriyetindeki Temsilciligi Qırım yarımadasındaki Rusiye işğaliniñ birinci künlerinden başlap, Ukrainanıñ istilâğa qarşı küreşine qol tutqan Kanada Ükümetine ve şahsen Kanada devletiniñ Ukrainada Fevqulâde ve Tolu Vekâletli Elçisi Larısa hanım Ğaladzağa öz münnetdarlığını bildire.