2017 senesi dekabr 20 künü Daimiy Temsilciniñ yolbaşçılığında, onıñ Birinci muavini ve vaqtınca işğal olunğan topraqlardan köçken vatandaşlarnen çalışqan hızmetniñ reisi iştiragi ile vaqtınca işğal etilgen topraqlarnıñ aktual meseleleri boyunca iş gruppasınıñ nevbetteki oturışı Çaplınka qasabasında olıp keçti. Oturışta Çaplınka devlet memuriyetiniñ reisi, birleştirilgen territorial cemiyetleriniñ (BTC) reisleri ve memurları, yerli icra akimiyetniñ ve vaqtınca işğal etilgen topraqlarda yaşağan vatandaşlarnen çalışqan cemaat teşkilâtlarınıñ vekilleri iştirak etti.
Oturış iştirakçileri, Qırımda yaşağan Ukraina vatandaşlarına memuriy hızmet saasında pasportlaşmanen bağlı meselelerniñ qolaylaştıruvını muzakere ettiler. Cemaat teşkilâtlarnıñ vekilleri kene de qaparcılıq telükesini ve Herson vilâyetinde Devlet migratsiya hızmetiniñ bölüklerinde elektron nevbetıne yazıluvnıñ imkânları sıñırlı olğanını qayd ettiler. Daimiy Temsilci qayd etkenine köre, bu meselelerniñ esas çezüv vastası – vilâyetniñ territorial cemiyetleriniñ negizinde memuriy hızmet merkezleriniñ teşkil etilüvidir.
Rayon devlet memuriyetiniñ yolbaşçısı ve birleştirilgen territorial cemiyetleriniñ vekilleri 2018 senesi biometrik pasportlarnen ve ID-kartlarnen çalışacaq böyle merkezlerni Çaplınka ve Askaniya Nova qasabalarında teşkil etmege niyetleri olğanını bildirdiler. Bunıñ neticesinde, Çaplınka rayonında pasport hızmetlerini alacaq vatandaşlarnıñ, bu cümleden, Qırım sakinleriniñ mıqdarı, eñ az 3 kere artacaq. Daimiy Temsilci ve iş gruppasınıñ başqa azaları pasportlaşma meselelernen bağlı bütün qaparcılıq vaqialar aqqında cemaat teşkilâtlarnıñ vekillerini Ukraina havfsızlıq hızmetiniñ Qırım MC ve Aqyar boyunca Baş idaresiniñ temsilcilerine haber etmege çağırdılar.
Oturış devamında vaqtınca işğal olunğan topraqlardan devlet içinde köçken şahıslarğa yardım imkânları muzakere etildi. Çaplınka rayonında az miqdarda devlet içinde köçken şahıslar yaşay. Olarğa köre, vaqtınca işğal etilgen topraqlarda yaşap, öz gumanitar meselelerini çezmege ve vatandaşlıq aqlarınen qullanmağa kelgenler daa ziyade. Cemaat teşkilâtlarınıñ vekilleri vatınca işğal etilgen topraqlarda yaşağan vatandaşlarnıñ statusını, bu cümleden, ekinci nevbetteki yardımnıñ ve memuriy hızmetlerlerniñ berilüvini qanuniy şekilde belgilemege kerek olğanını qayd ettiler. Çaplınka uquqiy büronıñ temsilcisi, rayonda advokatlar olmağanını, rayon makemesinde yalıñız bir makemeci mevcüt olğanını, rayon boyunca yalıñız eki notarius çalışğanını bildirdi. Kadro saasında böyle vaziyet Qırım sakinlerine memuriy hızmetlerniñ, bu cümleden, vaqtınca işğal etilgen yerlerde olıp keçken doğuv ya da ölüm aqqında şeedetnamelerniñ berilüvine, menfiy tesir ete. Daimiy Temsilci rayon akimiyetini, Qırım sakinleriniñ uquqiy hızmetlerge ihtiyacı olğan arada mütenasip vazifelerni becerebilecek adliyecilerniñ sayısını arttırmaq maqsadınen yerli eali arasında iş alıp barmağa çağırdı.
Oturışta vaqtınca işğal olunğan topraqlarnıñ sakinleriniñ ‘‘Qalançaq’’ kiriş-çıqış nezaret noqtasından (KÇNN) qıta Ukrainağa seferleri içün resmiy naqliyat vastaları meselesi de köterildi. Daimiy Temsilci ve onıñ Birinci muavini ‘‘Vadim-Herson-Kıyiv’’ daimiy uzaq mesafeli yolcı naqliyatını teşkil etmege tırışqanları aqqında haber ettiler. Daimiy Temsilci aytqanına köre, ‘‘Ukrzaliznitsya’’ halq öğündeki aktsioner cemiyeti işğalci memleketniñ paytahtına onlarca kündelik tren seferlerini teşkil etken arada, Qırım sakinleri içün Ordan (Perekoptan) adiy ve qolay yolcu naqliyatını teşkil etip olamay.
Daimiy Temsilciniñ Birinci muavini, Herson vilâyeti ve Qalançaq rayonı devlet memuriyetleri uzun vaqıt devamında Qalançaq ya da Çaplınka köylerinden keçken ‘‘Qalançaq KÇNN – Herson’’ ve ‘‘Qalançaq KÇNN – Qalançaq’’ marşrutları boyunca youlcu naqliyatına konkurs ilân etmekten qaçınğanlarını hatırlattı. Çaplınka rayon devlet memuriyetine ‘‘Qalançaq KÇNN – Çaplınka’’ avto seferlerine konkurs ilânı teklifinen Herson devlet memuriyetine muracaat etmege ve Çaplınka qasabasından KÇNN qadar taksi vastasınen yolcu naqliyatını qanuniy şekilge ketirmege tevsiye etildi.
Oturış iştirakçileri KÇNN-nıñ qışlıq mevsimine azırlığını muzakere ettiler. KÇNN yanında qızınmaq içün çadırlarnı qurmağa kerek olğanı qayd etildi, KÇNN-da vaqon şekilinde odaçıqları bulunğan cemaat teşkilâtlar da bozğun ava vaziyetinde zayıf vatandaşlarğa (balalarğa ve qart adamlarğa) qızınmağa teklif etmege çağırıldı. Qayd etildi ki, 2018 senesinde KÇNN donatıluvına merkeziy büdjetten para ayırılmağanı sebebinden, KÇNN-nı minimal seviyede donatmaq maqsadınen, Temsilcilik meseleni Ukravtodor kibi mesuliyetli teşkilâtlarınıñ ağımdaki maliyesi ve halqara tehnikiy yardım esabına çezmege tırışacaq.
Oturışta Temsilcilikniñ teşebbüsi ile 2018 senesinde Herson vilâyetine avuşacaq Ukraina Milliy Politsiyasınıñ Qırım MC ve Aqyar boyunca Baş idaresi bölükleriniñ Çaplınka rayonında yerşleştirme meselesi köterildi. Birinci muavin oturış iştirakçilerine Temsilcilikniñ yardımı ile işlep çıqarılğan Qırımda vefat etken şahıslarnıñ qıta Ukrainada kömülmesi içün KÇNN-dan keçirilüvniñ uquqiy esaslarını taqdim etti. Böyle naqliyatnı KÇNN telefonlarına evelden haber etip, iş künleri sabadan kerçekleştirmege daa qolay olğanı qayd etildi. Cenaze aqqında qanuniyetke köre, tabut ya da urna olarnı köçürgen şahıslar, devlet sıñır ve gümrük hızmetleriniñ temsilcileri ile beraberlikte telefon vastasınen añlaşıp KÇNN-dan makeme-tıbbiy ekspertiza keçirilecek eñ yaqın yerge (Qalançaq ve Çaplınka köyündeki, Geniçesk şeerindeki, ya da başqa yerledeki tıbbiy merkezlerine) ozğarılmalı. Teessüf ki, bu yerlerde tabut ya da urna açılmalı. Temsilcilik mevtalarnı KÇNN-dan keçirgen vaqıtta qaparcılıqqa rast kelgen bütün şahıslarnı böyle vaqialar aqqında Temsilcilikke ve Ukraina Havfsızlıq Hızmetiniñ Qırım MC ve Aqyar boyunca Baş idaresiniñ hadimlerine bildirmege çağıra.
Oturış iştirakçileri Çaplınka rayonında informatsion havfsızlıq meselesini, bu cümleden, vaqtınca işğal etilgen topraqlardan propaganda yapqan, ukrain ve qırımtatar halqlarınıñ genotsidini, Ukrainağa qarşı Rusiye istilâsını, askerileştirilmesini aqlağan, nefret ve duşmanlıqqa qozğalağan ve yalancı haberlerni darqatqan qanunsız yayınlavlarnı muzakere ettiler. Devlet televizion ve radio yayınlav komiteti vaqtınca işğal etilgen topraqlarına yaqın olğan Herson vilâyetiniñ mesken yerlerinde böyle yayınlavnıñ közetüvini keçirmegeni alda, Daimiy Temsilci Çaplınka rayonında territorial cemiyetleriniñ yolbaşçılarnı böyle yayınlavlarnıñ şekili ve mündericesi aqqında Temsilcilikke resmiy sürette haber etmege çağırdı. Çaplınladaki televizion kulesiniñ yayınlav imkânlarınıñ 2018 senesinde quvetleştirüvı da muzakere etildi.
Bundan da ğayrı, iş grupasınıñ oturışında Ukrainanıñ vaqtınca işğal etilgen Qırım topraqlarınen bağlı ekologik havfsızlıq meseleleri de muzakere etildi. Rayon devlet memuriyetiniñ yolbaşçısı ve territorial cemiyetleriniñ temsilcileri aytqanlarına köre, işğalci akimiyetke boysunğan Ermeni Bazar (Armyansk) ve Yañı Qapu (Krasnoperekopsk) himik sanayısınıñ faaliyeti Sivaşnıñ avasını ve havuzlarını kütleviy sürette tozaqnen bulaştıra. Oturış iştirakçileri mütenasip cinaiy iş çerçivesinde Qırım Muhtar Cumhuriyeti Savcılığı uzun müddet devamında yerli akimiyetnen yazışqanını qayd etti. Daimiy Temsilciniñ birinci muavininiñ ayqanına köre, mezkür cinaiy iş Temsilcilikniñ mahsus nezareti altında bulunacaq. Keñeşten ve rayon devlet yolbaşçısınen rayon inkişafınen bağlı meselelerniñ muzarekesinden soñ, Daimiy Temsilci ve onıñ Birinci muavini Qırımnıñ sıñırındaki ayırıcı yolaqnıñ yanına barıp, mezkür bulaştıruv daimiy şekilde kerçekleşkeniniñ şaatları oldılar.