2018 senesi berim ayı (sentâbr) 25 künü Temsilcilikteki halqara alâqalar hızmetiniñ reisi Yevgen Samuha ve işbu hızmetniñ baş mesleatçısı Valeriya Pahomova Ukraina tasil ve ilim Nazirliginde antiterror ameliyatı keçirilgen yerlerden vaqtınca köçürilgen aliy oquv yurtlarınıñ rektorları Şurasınıñ toplaşuvında iştirak ettiler.
Toplaşuvda Ukraina tasil ve ilim Naziriniñ Birinci muavini Volodımır Kovtunets, Ukraina tasil ve ilim Nazirligindeki bölüklerniñ reisleri, köçürilgen aliy oquv yurtlarınıñ rektorları, ‘‘Avopa Birligi tarafından Ukraina Şarqına qol tutuv’’ leyhasınıñ reisi Stanislav Topolnitskiy, Ukrainadaki Avropa Birliginiñ Temsilciliginde tasil, gençlik ve ilim bölüginiñ Yöneticisi Vira Rıbak, Ukrainada Britaniya şurasınıñ müdiri Saymon Vilyams, Ukrainada AQŞ Elçihanesiniñ Birinci kâtibi, medeniyet ve tasil meseleleri boyunca Attaşesi Şon O’Hara, ‘‘Açıq siyaset’’ cemaat teşkilâtınıñ vekili İnna Kovalik, Umumukrain futbol studentler birligi Prezidentiniñ muavini Vadım Misüra iştirak ettiler.
Toplaşuv esnasında vaqtınca köçürilgen aliy oquv yurtlarınıñ faaliyetindeki problemli meseleler muzakere etildi, 2018 senesi kiriş kampaniyasına yekün çekildi, 2019 senesi kiriş kampaniyasını mükemmelleştirüv boyunca teklifler diñlendi.
Bundan da ğayrı, köçürilgen aliy oquv yurtlarında çetelden studentlerni oqutuv imkânları baqıldı ve böyle studentlerni oquvğa yollanuv esnasında peyda olğan sualler muzakere etildi.
Vaqtınca işğal etilgen Qırımdaki aliy oquv yurtalarınıñ litsenziyalarını ğayrıdan tiklev, mütehassıslarnı ve kerekli maddiy-tehnikiy bazanı qıdıruv meseleleri de baqıldı.
Köçürilgen aliy oquv yurtlarınıñ ortaq ve donor teşkilâtları ile işbirliklerine, bu cümleden, studentlernen almaşuv leyhalarına, universitetler içün mahsus grantlarğa ve yarışlarğa ayrıca diqqat etildi.
Temsilcilikniñ vekilleri ‘‘Qırım-Ukraina’’ leyhasını devam etmege ve keñişletmege ve bu cümleden, qırımlılar içün Ukraina sağlıq saqlav Nazirliginiñ aliy oquv yurtlarında tasil aluv imkânlarnı teşkil etmege kerek olğanını qayd ettiler. Bundan da ğayrı, Ukrainanıñ ve ğarbiy devletlerniñ aliy oquv yurtları ile beraber faal şekilde işbirlik yapqan RF aliy oquv yurtlarınıñ terkibiy bölükleriniñ işğal etilgen Qırımda qanunsız faaliyeti muzakere etildi.