2018 senesi qural ay (mayıs) 23 künü Ukraina Prezidentiniñ Qırım MC Daimiy Temsilcisiniñ Birinci muavini İzet Gdanov ve Temsilcilikte halqara alâqalar ve uquqiy talil hızmetleriniñ baş mesleatçıları Ukraina Yuqarı Şurası Tışqı işler Komitetiniñ oturışında iştirak ettiler. Komitetniñ toplaşuvı esnasında, başqa meselelernen bir arada, ukrain ‘‘Nord’’ balıqçı gemisi misalinde istilâcı devletniñ Ukrainada akkreditatsiya esasında bulunğan diplomatik ve temsilci teşkilâtları tarafından qanunsız şekilde pasportlarnıñ berilüvi, vatandaşlarnıñ bu muessiselerde qanunsız şekilde bulunması ve olarnı qanunsız şekilde Ukrainadan çıqarmaq ıntıluvları muzakere etildi. Bundan da ğayrı, oturış devamında Berdânsk ve Mariupol deñiz ticaret limanlarınıñ faaliyetine menfiy tesir etken RF arbiy areketleriniñ Azaq deñizinde ve Keriç boğazında quvetleşmesi, Ukrainada ale daa faaliyetini alıp barğan Rusiye deñiz gemiciligi qaydınıñ idarelerine qarşı kirsetilecek sanktsiyalarnıñ hususiyetleri, Ukraina ile RF arasında Azaq deñizini ve Keriç boğazını beraberikte eşletüv, olarnıñ suvlarında balıq avcılığı ve gemicilik boyunca imzalanğan añlaşmalarnıñ toqtatıluvı meseleleri de köterildi.