Ukraina Çetel işler naziri Pavlo Klimkin Türkiyege ziyareti çerçivesinde Türkiye Prezidenti Recep Tayıp Ergoğan ile körüşti. Türkiye devletiniñ başlığı ile körüşüvde Qırımtatar halqınıñ meseleleri boyunca Ukrayna Prezidentiniñ yardımcısı Mustafa Cemilev, Ukraina Haber siyaseti naziriniñ Birinci muavini Emine Ceppar ve Ukraina Halq deputatı Mariya İonova iştirak ettiler.

Bundan da ğayrı, körüşüvde Türkiye Prezidentiniñ yardımı ile rusiye esirliğinden azat etilgen Qırımtatar Milliy Meclis reisiniñ muavinleri İlmi Umerov ve Ahtem Çiygoz bulundılar.

Pavlo Klimkin qayd etkenine köre, devletimizniñ vaqtınca işğal etilgen topraqlarda yaşağan Ukraina vatandaşlarınıñ işğalci devlet tarafından bozulğan aq-uquqlarınıñ ve qanuniy menfaatlarınıñ qorçalavı Ukrainanıñ diqqat merkezinde daima buluna. Bunınen beraber, bu meseleler bizim strategik partnerimiz olğan Turkiyeniñ diqqat merkezinde de bulunması pek muimdir. Nazir bu ceryanğa qırımtatar halqınıñ liderlerini celp etip, işğal etilgen Qırında ve RF topraqlarında maküm etilgen ukrainalı siyasiy mabüslerni azat etmek maqsadınen işbu yönelişte ukrain-türk işbirligini devam ettirmege kerek olğanını qayd etti.

Körüşüv devamında eki taraflı ukrain-türk munasebetleriniñ inkişaf etmesine, bu cümleden, ticariy-iqtisadiy işbirlikke ve insaniy ölçevge yüksek qıymet kesildi. Bundan da ğayrı, taraflar bu sene Türkiyede eki devletniñ prezidentleri yolbaşçılığında keçirilecek yüksek seviyede Strategik şurasınıñ Yedinci oturuşına azırlıqnıñ esas noqtalarını muzakere ettiler.