Oktyabr 9 künü 2017 senesi Türkiye Prezidenti Recep Tayip Erdoğan Ukrainanı ziyaret etti. «Yazıqlar olsun ki, bütün barışıq teşşebüs ve ğayretlerge, bu cümleden, Normand formatında kerçekleşken areketlerge baqmadan, Ukrainağa qarşı Rusiyeniñ tecavuzı, demek ki, Qırımnıñ işğali devam etmekte. Prezident Erdoğannen beraber Qırımda insan aq-uquqları saasında vaziyetniñ işğalci akimiyetniñ cezalav areketleri neticesinde devamlı kerginleşkenini teñqid ettik», – dep qayd etti körüşmeden soñ teşkil etilgen matbuat konferentsiyasında Petro Poroşenko. Onıñ aytqanlarına köre, tintüv ve apis, zulum ve taqip, qorqutma ve işğalnen ya da işğalcilerniñ siyasetinen razı olmağan bütün adamlarnıñ quvalanması Qırımda adetteki iş oldı. «Eñ ziyade qırımtatar halqı ve Qırımtatar Milliy Meclis azaları taqip etile. Ahtem Çiygoz, İlmi Umerov, Mıkola Semena ve başqaları – siyasiy cezalav qurbanlarınıñ cedveli toqtamay artmaqta», – dep ayttı Prezident.
«Bügün biz halqara vastalarınen, şu cümleden, halqara közetüvı yolunen Qırımda insan aququqlarnı ve serbestlikni qorçalavı içün yapılacaq areketlerimizni ileride de birleştirmege añlaştıq»- dep bildirdi Petro Poroşenko. Ukraina devletiniñ reisi aytqanına köre, Rusiye halqara uquqına riayet etmeli ve BMT Baş Assambleyasınıñ dekabr 19 künü 2016 senesi alınğan 71/205-sanlı qararını ve Halqara mahkemeniñ 2017 senesi aprel ayında vaqtınca alınğan qararlarını yerine ketirmeli. «Bundan da ğayrı, Nyü-Yorkta BMT Baş Assambleyasınıñ minberinden Qırımnıñ azat etilüvi tarafdarlarınıñ gruppasını teşkil etmege teklif etken edim, ve ümüt etemiz ki, Türkiye de onıñ terkibine kirsetilir», – dep ayttı Prezident. Poroşenko, Rusiyeniñ işğalnı qanunlaştırma ıntıluvları muvafaqıyet qazanamayacağından emin, çünki bütün dünya halkqara qanunlarğa riayet etilmesiniñ tarafdarıdır.
«Regionımıznıñ tınçlığı, havfsızlığı ve istiqrarı içün Ukraina muim memlekettir», – dep ayttı öz nevbette Türkiyeniñ Prezidenti Recep Tayip Erdoğan. Onıñ aytqanına köre, müzakere neticesinde Qara deñiz regionınıñ tınçlığını teminlemek maqsadınen yapılacaq areketlerni eki memleket özara uyğunlaştıracağı aqqında qarar alındı.
«Poroşenko efendige bir daa tekrarladım, Türkiye Ukrainanıñ bağımsızlığına, bütünligine, Qırımnen beraberligine ve siyasiy birleşüvine qol tutacaq. Qırımnıñ qanunsız işğalini qabul etmedik ve etmeymiz», – dep qayd etti Türkiyeniñ Prezidenti.
Ukrainanıñ qırımtatar halqına qoltutuvını ayrıca qayd eterek, Türkiyeniñ ileride de halqara seviyede qırımtatar meselesine qol tutacağını vade etti. Recep Tayip Erdoğan bu meseleniñ ancaq halqara uquqı esasında çezilebilecegini em de uquqiy ve diplomatik saada yapılğan areketlerniñ muimligini qayd etti.
Ukraina devletiniñ reisi Türkiyege ve onıñ Prezidenti Recep Tayip Erdoğanğa Ukrainanıñ bağımsızlığına, bütünligine, Qırımnen beraberligine ve siyasiy birleşüvine qattı şekilde qol tutqanı ve Rusiye Federatsiyası tarafından Ukrainanıñ şarqına qanunsız tecavuzını qabul etmegeni içün teşekkür etti. Halqara uquqnıñ ğayrıdan tiklenüvine yardım etmemiz ve bu saada areketlerimizni uyğunlaştırmamız pek muim. Türk şeriklerizge işğal olunğan Qırımda insan aq-uquqlarınıñ bozuluvını qattı şekilde qabul etmegenleri ve qırımtatar halqına açıq-aydın şekilde qol tutqanları içün minnetdarmız», – dep qayd etti Ukraina Prezidenti.