Oktyabr 6 künü 2017 senesi Türkiye gemi areketleri ticariy ve sanaiy odasınıñ reberiyeti deñiz taşımacılığı ve limancılıq ile oğraşqan bütün müessiselerge «Qara deñiz ve Qırım regionlarda belgilengen gemicilik esasları» adlı talimatını yolladı. Bu talimatta, «bizim (Türkiye) memleketimizniñ tış siyasetini diqqatqa alıp, Qırım limanlarına gemi kirmesiniñ ögüni almaq kerekligi» aqqında söz yürsetile.

Türk limanlarına, deñiz agentlerine, aracılarğa ve gemilerniñ saiplerine «Qırım regionı ve limanlarından kelgen gemiler bizim (Türkiye) memleketimizge kirsetilmeycegi, bu regionnıñ limanlarından çıqmasına ise ruhset berilmeycegi» resmiy şekilde haber etildi.

Bundan ğayrı, qattı nezaret sisteması areketke keçirilecek. «Qara deñiz limanından bir de bir gemi kelgeni haber etilgende, onıñ liman reberiyeti tarafından refaqatı ve nezareti içün gemiden ziyaret etilgen soñki limandan çıqışı aqqında vesiqalar ve gemi defterindeki soñki limandan çıqışı aqqında yazıları talap etilecek. Bundan ğayrı, mevcüt olğan bütün tertibatlarnı ve AIS kibi açıq ceryanlarnı qullanıp, geminiñ kerçekten de qayd etilgen limandan kelgeni teşkerilecektir». Bundan da ğayrı, «…limannıñ reberiyeti gemiden «İşbu bu geminiñ soñ çıqış noqtası Qırım limanı olmağanını, bu limandan Qırımğa ketmegenini ve Qırım ile bağlı iç bir türlü liman, gümrük ve ticaret işlerinen oğraşmağanımıznı beyan ve tasdıq etemiz» şekilinde yazılı vade almalı. Yuqarıda qayd etilgenge zıt olğan nasıldır adise tasdıqlansa, bütün liman masraflarını bizim idaremiz tölecek ve uquqiy mesuliyetke de çekilecektir».

Nezaret ve refaqat şahsen er Türk limanınıñ reberiyeti tarafından yapılacaqı aqqında da bildirile. Bu talimat ameliyatqa keçirilse, Türk liman idareleriniñ sözü Bosfordan keçken bütün gemilerge keçecek.