Fevralniñ 26-da Kıyivniñ “Jovten” kinoteatrinde elâk olğan Ukrayina Qaramanı Gennadiy Afanasyev aqqında “Probaç meni, mamo” (“Bağışla meni, anam”) filminiñ premyerası olıp keçti. Filmniñ numayışında arbiyler, cemaat teşkilâtlarınıñ vekilleri, faaller, devlet hızmetçileri, Gennadiyniñ dostları ve tanışları toplandılar.

Tedbir cenkte elâk olğanlarnı añmaq içün sükünet daqqası ve Gennadiy Afanasyev sağ ekende yazıp alğan Vasil Simonenkonıñ şiirinen başlandı. Bundan soñ kiriş qısımda çıqış yapqanlar Gennadiynen bağlı eñ yahşı hatırlavlarınen paylaştılar.

Daimiy Temsilci Olga Kurışko filmniñ Qırım Muhtar Cumhuriyeti ve Aqyar şeeriniñ vaqtınca işğaline qarşılıq kününde kösterilmesiniñ müimligini qayd etti.

“Qarşılıq kösterüv cesaret ve menlik aqqındadır. Ve Gennadiy bu degerliklerniñ timsalidir. O, bizni öz misalinen ruhlandıra, onıñ içün bizim onıñ qorantasına qol tutmamız ve onıñ faaliyeti aqqında ikâye etecek ve insanlarğa yardımcı olacaq işni devam etmek müimdir.”

Tedbirge Ukrayina tış işler nazirliginiñ matbuat katibi Georhiy Tıhıy de qoşuldı. O, Gennadiy siyasiy mabüslerniñ azat etilmesi boyunca mahsus vekil olğanını hatırlatıp, Ukrayina öz suverenitetini deñiştirüv aqqında tüşünmegenini ve kelecekte de Ukrayina vatandaşlarınıñ esirlikten azat etilmesi içün küreşni devam etecegini qayd etti.

“Qırım meselesi iç bir vaqıt kün tertibinden çıqarılmaycaq. Bizim devlet olaraq ahlâqiy aqqımız ukrayin Qırımını qorçalamaqtır ve biz bu küreşke hainlik yapıp olamaymız.”

Öz nevbetinde arbiy ombudsmen Olga Kobılınska Gennadiy Afanasyevniñ yoqluğını añlamaq ağır olğanını qayd etti. Aynı vaqıtta onıñ qızı, apayı, anası ve qartanası – onıñ hatırasını ve misalini saqlamağa devam etken qorantanıñ yanında qaluv pek müimdir.

Halq deputatı Tamila Taşeva Gennadiyniñ esirlikten azat etilgen soñ onıñ faaliyetini hatırlap, oña Ukrayina Qaramanı unvanını berüv bütün memleket içün müim ve adaletli qarar olğanını qayd etti.

İnsan aqları faali Olga Skripnik qayd etkenine köre, onıñ içün Gennadiy ukrayin ve qırım qarşılıq kösterüviniñ esas adlarından biridir. O, daa bir kere 2026 senesi fevral ayına qadar yarımadada 280-den ziyade adam mahkeme taqibi siyasetine oğratılğanına, olardan 159-ı qırımtatar olğanına diqqat çekti.

Kiriş qısmı, Gennadiy Afanasyevniñ ömür arqadaşı ve anasınıñ çıqışlarınen devam etti. Anası Olga Afanasyeva onıñ azat etilmesi içün küreşken ve eñ ağır vaqıtlarda qorantağa yardımcı olğan er keske teşekkür bildirdi. O, Gennadiyniñ anası olmaq ve onıñ hatırasını saqlamaq onıñ içün büyük şeref olğanını qayd etti.

Gennadiyniñ apayı Lüdmila aqayınıñ dünyağa sevginen tolu adam olğanını ifade etti. Onıñ aytqanına köre, bu sevgi tam manada onıñ közünde parlay edi – ve eger bugün bütün bu insanlar bir yerde toplaşqan olsalar, demek, o sevgi mında olağanlarnıñ er birine tesir etti.

Filmniñ numayışı qarşılıq kösterüvniñ fiyatını ve onıñ devamı içün mesülietni kene bir kere añlamaq içün bir fırsat oldı. Gennadiyniñ hatırası tek keçmiş degil de, Qırımnıñ azat etilmesini ve Ukrayina ğalebesini yaqınlaştırğan bugünki qararlar ve areketler aqqındadır.

Tedbirni Ukrayina institutınıñ baş müdir muavini, insan aqqorçalayıcısı, jurnalist Alim Aliyev alıp bardı. Tedbirniñ teşkilâtçıları: Ukrayina Prezidentiniñ Qırım Muhtar Cumhuriyetindeki Temsilciligi/Qırım platforması ofisi, Qırım insan aqları gruppası, ZMINA insan aqları merkezi, QırımSOS.