2026 senesi fevralniñ 12-nde Temsilcilikte Ukrayinanıñ vaqtınca işğal etilgen topraqlarından çıqqan Ukrayina vatandaşlarınıñ tibbiy hızmetlerge irişüvi boyunca iş toplaşuvı olıp keçti.

Subetke, Ukrayina Sağlıq Nazirligi, Ukrayina Tasil ve İlim Nazirligi, Ukrayina Milliy Sağlıq Hızmeti, Qırım Muhtar Cumhuriyetiniñ ve Aqyar şeeri prokuraturasınıñ vekilleri, em de ekimler, Ukrayinağa qarşı silâlı tecavuz qurbanlarınıñ aqlarını qorçalavnen oğraşqan teşkilâtlar ittifaqınıñ uquqqorçalayıcıları, “Rokada“ hayriye fondu, Physicians for Human Rights, “Afina. Qadınlar rak hastalığına qarşı” cemaat teşkilâtı, “Ukrayina cemaat sağlığı fondu” halqara hayriye fondu temsilcileri qoşuldılar.

Muzakere vaqtında iştirakçiler vaqtınca işğal etilgen topraqlarnıñ sakinleri tibbiy yardım almaq içün muracaat etkende, tek işğalci organlar tarafından berilgen tibbiy vesiqalarnı kösterip olğanlarını qayd ettiler. Böyle vesiqalarda tibbiy yardım talap etken hronik hastalıqlar, yapılğan ameliyatlar ve yapılğan aşılamalar aqqında malümat yer almaqta. Ve Ukrayina işğalciler tarafından berilgen vesiqalarnı tanımasa da, hastanıñ sağlığı aqqında malümat çoq vaqıt ayat ve ölüm meselesidir.

Bu sebepten muzakereniñ esas taraflarından biri, içinde olğan malümat vatandaşlarnıñ yaşayışı içün pek müim olğan ve tedaviylevniñ semereligini temin etmege imkân bergen tibbiy vesiqalar cedvelini belgilemek oldı.

Toplaşuvdan soñ iştirakçiler vaqtınca işğal etilgen topraqlardan kelgen vatandaşlarğa Ukrayina ükümeti tarafından nezaret etilgen bölgelerge köçip kelgende özlerinen nasıl tibbiy vesiqalarnı alıp kelmek kerekligi aqqında malümat bermege, em de işğal etilgen topraqlardan çıqqan vatandaşlarnıñ yanında olğan ayrı tibbiy vesiqalardan malümatnı esapqa aluv algoritmlerini belgilev boyunca işni devam etmege keliştiler.