Bugün Temsilcilikte Qırımnıñ kögnitiv deokupatsiyası boyunca Şuranıñ onuncı, 2025 senesi ise birinci toplaşuvı olıp keçti. Tedbirde 48 insan iştirak etti, olarnıñ arasında Daimiy Temsilci Olga Kurışko, devlet akimiyeti, nazirlikler, cemaat, diniy, ilmiy ve ekspert daireleri vekilleri bar edi.

Daimiy Temsilci Olga Kurışko açılış sözünde toplaşuvğa qoşulğanlarğa teşekkür bildirdi ve soñki bir qaç ay içinde Temsilcilik faaliyetiniñ esas yönelişlerini qayd etti. O, tasil teşebbüslerini kenişletmekniñ, şu cümleden universitetlernen işbirlikni inkişaf etmekniñ ve Qırım aqqında bilgilerni terenleştirmege yönelgen tasil merkezlerini yaratmaqnıñ müimligini qayd etti. Ukrainanıñ diplomatik ve kommunikatsiya ğayretleri çerçivesinde vaqtınca işğal etilgen topraqlarda yaşağan insanlarnıñ taqdirine diqqatnı celp etmekniñ de müimligini qayd etti.

“Şimdi devletimizniñ pozitsiyasına qoltutmaq içün halq ögündeki meydanda Qırım ve onıñ sakinleri mevzusınıñ bulunuvını quvetleştirmek soñ derece müimdir. İşğal altında yaşağan insanlarnıñ taqdiri ve tecavuzcı devletniñ cinayetleri er keske belli olmaq kerek”, – qayd etti Olga Kurışko.

Tedbirniñ moderatorı ve Temsiliclikniñ malümat teminlevi bölüginiñ müdiri Yevğen Bondarenko Temsilcilikniñ yaşlarğa baqtırılğan siyaset saasında yapqan işine diqqat ayırdı. Bu sene olıp keçken ve şimdi de devam eteyatqan yaşlar içün tedbirlerniñ neticelerine esaslanıp, analitik raport azırlanacaq, onıñ içinde Qırım meselelerini ve Ukraina tamır halqları arasından yaşlarğa qoltutuv mevzusını Yaşlar ve sport nazirliginen beraberlikte Milliy yaşlar strategiyasına kirsetilmesi içün tevsiyeler olacaq.

Şura toplaşuvında memorializatsiya ve oquv yurtlarınen sistemalı işbirlik meseleleri de muzakere etildi. Temsilcilikniñ deokupatsiya ve reintegratsiya bölügi müdiriniñ muavini Lüdmila Şevçuk ayrıca Temsilcilikniñ oquv yurtlarınen çalışmaq içün algoritm işlep çıqarğanını ve ocalar içün vaqtınca işğal etilgen Qırım mevzusını aydınlatmaq içün usuliy tevsiyeler azırlanğanını qayd etti. Toplaşuv iştirakçileri tasil ceryanında ömürge keçirilmesi mümkün olğan tekliflerini bildirdiler. 18 mayıs qırımtatar halqı genotsidiniñ qurbanlarını añma kününiñ qayd etilmesine ayrıca diqqat ayırıldı, Temsilcilik tarafından desteklengen tedbirler taqdim etildi. Körüşüv iştirakçileri Qırım meselesi üzerinde zenaat müitinden başlap, devlet organları seviyesine qadar bütün seviyelerde er taraflama ve izçen iş alıp barılmasınıñ müimligini qayd ettiler. Temsilcilik ortaq ğayretlerde faal iştirak etmege çağırıda bulundı, çünki birlikte yapılğan ortaq çalışmalar sayesinde tam miqyaslı cenkniñ ağır şaraitlerinde bile Qırımğa diqqatnıñ devam etmesini temin etmek mümkün.