Bu sene mayısnıñ 29-ndan iyünniñ 1-ne qadar devam etken “Kitap Arsenalı” 13-nci halqara festivalinde, “Serbest Qırımğa mektüpler” teşebbüsiniñ stendi de bar edi. “Serbest Qırımğa mektüpler” vaqtınca işğal etilgen Qırımda ve rusiyede tutulğan siyasiy mabüslerge birdemlik platformasıdır.

Dört kün devamında Qırımlı siyasiy mabüslerge qol tutmaq içün festival iştirakçileri 294 destek mektübi yazdı. Er bir mektüp, öz mevamı, cemaat faaliyeti ya da kimligi içün qanunsız olaraq apiske alınğan semetdeşlerimizge yollanacaq.

Kanadanıñ Ukrainadaki Fevqulâde ve Salâhiyetli Elçisi Natalka Tsmots “Serbest Qırımğa mektüpler” aktsiyasına qoşulıp, jurnalist Osman Arifmetovğa destek mektüp yazdı. O, 2019 senesi rusiye tarafından terroristik faaliyetinde qanunsız şekilde qabaatlanğan ve azatlıqtan marum etilgen 25 qırımtatardan biri. Elçi hanım ayrıca “Menim sürgünligim” kitabını satıp aldı. Bu kitap SİZO-da bulunuv aqqında yazılğan şahsiy ikâyelerniñ cıyıntığıdır. O, siyasiy mabüsler meselesiniñ halqara seviyede aydınlatılmasınıñ kerekligini, bunıñ içün çeşit aletlerniñ, hususan, Qırım mevzusında çalışqan ukrain jurnalistleriniñ materiallarını qullanmağa mümkün olğanını qayd etti, Qırım meselesine kelecekte de qol tutmağa niyetini tasdıqladı.

Teşebbüs, Ukraina Prezidentiniñ Qırım Muhtar Cumhuriyetindeki Temsilciligi, PEN Ukraina, ZMINA İnsan aqları Merkezi, Crimea Daily, QırımSOS, Qırım ceryanı tarafından ömürge keçirildi.

Stend yanında kitaplarnıñ tematik rafı bar edi. “Meniñ sürgünligim”, “Qırımnıñ serbest sesleri”, “Qırım içtimaiy-siyasiy deñişüvler şaraitinde”, “Qırım hanlığınıñ felsefiy fikri”, “Qırım inciri”, “Qırımtatarlar tamır halqı olaraq” kitapları Temsilcilik, ZMINA insan aqları merkezi ve PEN Ukraina tarafından temin etildi.

Er bir neşirniñ satışından paralar Qırım milliy varlıq fondunıñ (QMVF) para cıyuvına yiberildi. Bu sene toplanğan bağış 31 400 grivnanı teşkil etti ve Ukraina Mudafaa nazirliginiñ Baş istihbarat idaresi içün pilotsız uçaqlarnıñ satın alınmasına yollanıldı.