Ukraina Prezidenti Petro Poroşenko rusiye apishanelerinde, işğal etilgen Qırımda ve Donbasta tutulğan ukrain reineleriniñ qorantalarınen körüşti. Devletniñ Başlığı siyasiy mabuslarnı azat etüv oğrunda al-azırda yapılğan ve kelecekte yapılacaq adımlar aqqında malümat berdi.

‘‘İlk yaz ayı (iyün) 11 künü Pavlo Klimkin Normand formatında çetel işler nazirleriniñ körüşüvine ketecek. Ve reinerniñ azat etilüvi barışıq missiyasını, ateş toqtatuv rejimini başlatuv ve Minsk añlaşmalarını yerine ketirüv kibi meselelernen bir sıradadır. Biz öz noqtaiy-nazarımıznı uyğunlaştırdıq, fransız ve alman taraflar da bizge qol tutalar’’, – dep ikâye etti Prezident. Bundan ğayrı o, Donetsk ve Lugansk vilâyetlerinde vaziyetni barışıq yolunen çezüv  boyunca Ukraina Prezidentiniñ Vekâletlisi İrına Geraşçenko ukrain siyasiy mabuslarnı deñiştirmek maqsadınen Ukrainada casuslıq faaliyetinen oğraşqan 23 rusiyeliden ibaret olğan cedvelni uç taraflı gruppanıñ Minskte körüşüvi devamında resmiy şekilde taqdim etkenini bildirdi.

Bundan da ğayrı, Petro Poroşenko Yuqarı Şurasınıñ İnsan aqları boyunca vekâletlisi Lyudmila Denisovağa Qırımdaki siyasiy mabuslarnı ziyaret etmek içün kerek olğan adımlarnı yapmaq ricasınen muracaat etti. Prezident Qızıl Haç Halqara Komitetiniñ reislerinden biri olğan Lihtenşteyn Qırallığınıñ Printsessası Sofiya ile körüşkenini bildirdi, o ukrain siyasiy mabuslarğa muntazam irişim ve Qızıl Haç Halqara Komiteti tarafından gumanitar yardım meselelerini kötermege vade etti.

Ukraina Prezidenti ukrain reinelerni azat etüv onıñ  bütün halqara muzakerelerinde mevcüt olğanını qayd etti. Bu cümleden, Petro Poroşenko AQŞ Devlet Kâtibi Mayk Pompeo ve Kanada Baş naziri Castin Trüdo ile telefon subetleri devamında ukrain siyasiy mabuslarnıñ meselesini Büyük yedilik memleketleri yolbaşçılarnıñ körüşüvinde kötermege kerek olğanını muzakere etti. Bu mesele Aahende Almaniya Kantsleri Angela Merkel ve Fransa Prezidenti Emmanuel Makron ile de muzakere etildi. ‘‘Bizge halqara birdemlik ve Rusiyege basqı devam etecegine işanç bildirldi’’, – dep qayd etti devletniñ Başlığı.

Prezident bütün ukrain reinelerine öz qol tutuvını bildirdi ve Ukraina olarnıñ azat etilüvi içün küreşmege devam etecegini olarğa bildirmege rica etti. Bundan ğayrı o açlıq ilân etkenlerge ‘‘Bizge sağ qalmañız kerek’’, – dep muracaat etti.

Körüşüv esnasında Qırımtatar Milliy Meclisiniñ reis muavini Ahtem Çiygoz 80 künden ziyade açlıq tutqan ukrain mabus Volodımır Baluhnıñ muracaatını oqudı. O ‘‘moskova işğalcilernen muqqades küreşni’’ alıp barğan vatanperver vatandaşlarnıñ ve cemaat teşkilâtlarnıñ ğayretlerini birleştirmek içün devletni faal areketler yapmağa çağırdı. ‘‘Fikirimce, Ukraina Prezidenti yanında mesleatçı-koordinatsion şuranıñ teşkil etilüvi siyasiy mabuslarnı azat etüv, vaqtınca işğal etilgen Qırımda Ukraina vatandaşlarınıñ aq ve serbestliklerni qorçalav oğrunda devletniñ areketlerini daa semereli yapıp, rusiye propaganda ile küreşte haberleşüvni eyileştire. Devlet ile Qırımdaki ukrain cemiyetniñ ğayretlerini birleştirip, biz adalet vaqıtını yaqınlaştırırmız ve Tañrı tarafından bizge berilgen topraqlarnıñ itibarlı saipleri olurmız. Qırım – Ukrainadır’’, – dep qayd etti Volodımır Baluh.