Ürmetli qırımtatar halqınıñ liderleri ve diniy reberleri, meclis azaları, Qırımda ve qıta Ukrainada yaşağan qırımtatarlar, aziz qardaşlarımız!

Sizlerni Ukraina ükümeti adından ve şahsen öz adımdan Qırımtatar halqı birinci Qurultayı 100-yıllığı munasebetinen hayırlayım.

100 yıl evelsi qırımtatar halqınıñ birinci milliy toplaşuvında Qırım Halq Cumhuriyeti ilân etildi. Bolşeviklerniñ istilâsı Cumhuriyetni bir qaç aydan soñ yoq etmesine baqmadan, onıñ ilân etilüvi yalıñız qırımtatar halqı ve Ukraina içün degil, bütün dünya içün büyük bir emiyet taşıy.Çünki o, müsülman cemiyetinde demokratik idare etüv leyhalardan biri ve dünyada birinci musulman cumhuriyeti edi. Birinci Qurultay, Ukraina ve Qırımda demokratik adetler evel-ezelden üküm sürgenini tasdıqlay.

100 yıl evelsi olğanı kibi, bügün Qırım toprağına kene de duşmanlar keldi. İşğal olunğan Qırımda yaşağan qırımtatarlar basqı ve repressiyalarğa oğray. İşğalci akimiyet olarnı qıynay, azatlıqtan marum ete, sahte cinaiy işler uydura ve haincesine öldüre. On binlerce qırımtatar ana toprağını terk etip, qıta Ukrainağa köçmege mecbur oldı.

Qırımnı azat etüv, qırımtatar halqını qorçalav meseleleri beraberlikte yapqan işimizde ilk nevbette turmaqta. Ukraina ükümeti vatandaşlarını işğalcilerden qorçalamaq ve qırımtatarlarnı öz toprağında kene de serbest yaşatmaq içün qolundan kelgenini yapa. Ukrainalılar ve qırımtatarlar defalarca beraberlikte qıyınlıqlarnı ve duşmanlarnı yeñip, birdemlik ve fikirdeşlikni numayış etti ve lâyıq yaşayış şartlarını yaratmağa tırıştılar. İnanam ki, nevbetteki Qurultay işgalcilerden azat etilgen Qırım toprağında çağırılır.

Ürmet ile,

Ukraina Baş naziri                       Volodımır GROYSMAN