Ukraina deñiz piyadesi teşkil etilüviniñ 100-yıllığı munasebeti ile keçirilgen tedbirlerde çıqışta bulunğan Prezident Petro Poroşenko, bütün ordumız kibi, deñiz piyadesi de bügünde-bügün cenkten evelkiden bir qaç qat quvetleşkenini qayd etti.
‘‘Ürmetli deñiz piyadesi askerleri, bu meydanda bulunğan er kes, bütün memleketimiz, sizge baqaraq, cesür, sebatlı, vatanperver, birleşken, iradeleri küçlü, ruhları qaviy, ğalebege inanğan ve özüne işanğan askerlerni köre. Em deñizde, em de onıñ yalısında, büyük fizikiy ve ruhiy ağırlıqlarğa baqmadan, eñ qıyın ve muim vazifelerni becermege azırlanğan askerlersiñiz. Siz daima cesürlikni ve mertlikni, tezlikni ve azimkârlıqnı, sarsılmaz israrlıqnı talap etken eñ qıyın yerlerdesiñiz.
‘‘Ordumıznıñ bu muim bölüginiñ arbiy imkânları kün-künden artmağa devam ete. Bölüklerge yañı ve yañılanğan silâ, arbiy tehnika ve zemanevy bağlanuv vastlarnıñ nümüneleri taqdim etile. Bü cümleden, keçken sene deñiz piyadesiniñ 503 sanlı ayrı taburına arbiy bayraqnı taqdim etkende söz bergenim kibi, deñiz piyadesi taqımını quvetli T-80 tankları ile temin ettik. Al-azırda daa bir taburnıñ yañı silâ ile teminlevi devam etmekte. Bundan ğayrı, deñiz piyadesi bölükleri yavaş-yavaş zemaneviy ‘‘БТР-70ДІ’’ zırhlı transportörler ile temin etilmekte. Buña qoşma olaraq, yaqın vaqıtta Ukraina Arbiy-Deñiz Quvetlerine taqdim etilecek eki zemaneviy ‘‘Kentavr’’ desant gemisi qurulmaqta’’, – dep qayd etti Petro Poroşenko. ‘‘Bu meydanda eñ yahşı askerler, bütün arbiy bölüklerniñ ve deñiz piyadesiniñ temsilcileri toplandı. Bir çoq adam Birleşken küçler ameliyatınıñ arbiy noqtalarından ve vaqtınca işğal etilgen Ukrainalı Qırım ile memuriy sıñirdan doğru mında keldi. Başqalarnen beraber bu meydanda ve deñiz piyadesi askerlerinen bir sırada işğal etilgen yarımadanı terk etip, öz topraqları içün küreşmege devam etken qırımtatar halqınıñ şanlı oğulları turmaqta’’, – dep bildirdi Prezident. Meydanda bulunğanlar arasında o deñiz piyadesi ayrı taburınıñ üyken zabiti, bayraqtar Eskender Kudusovnıñ ve atıcı-sanitar, yüken gemici Ruslan Ahmetovnıñ adlarını aytıp keçti, başqa qaramanlarnen beraber, Devletimizniñ Başlığı olarnı da bügün mükâfatlandırdı.
Mertlik ve cesürlik içün 391 deñiz piyadesı askeri devlet nişanları ile rağbetlendi. ‘‘290 asker yaralanğan, 34 ise ukrain toprağı içün canlarını bergen’’, – dep qayd etti Petro Poroşenko. Elâk olğanlarnıñ hatırasını sükünet daqqası ile añdılar.