Şu cümleden, «Yararlıq içün» ІІІ derece orden ile (cemaat faali, ‘Vinnitsâ şeerindeki ”Vetan” cemaat teşkilâtınıñ başlıq muavini) Nariman Bilâlov, (cemaat faali, vaqtınca işğal etilgen Qırım Muhtar Cumhuriyeti ve Aqyar şeeri topraqlarındaki aq qorçalayıcı) Abdureşit Cepparov, (Kremlniñ siyasiy mabusı) Volodımır Dudka; ”Knâginâ Olga” ІІІ derece orden ile (”İnsan aqları aqqında malümat merkezi” cemaat teşkilâtınıñ aq qorçalayıcısı) Alöna Lunöva ve (cemaat faali ve Kreml siyasiy mabusınıñ ömür arqadaşı) Mumine Saliyeva mükâfatlandırıldı.

”Qırımda yaşağan Ukraina vatandaşlarımıznı can-göñülden hayırlap, Ukrainanıñ topraq bütünligine ve egemenligine qol tutqanları, insan aqları qıymetleri oğrunda küreşkenleri, aq ve serbestliklerni qorçalağanları içün olarğa minnetdarlığımıznı bildiremiz!
Devletimiz Rusiye istilâsına qarşı Qırımnı işğalden azat etüv ve ğayrıdan integratsiya etüv oğrunda küreşken ve vaqtınca işğal etilgen topraqlarda yaşağan Ukraina vatandaşlarınıñ aqlarını ve serbestliklerini qorçalağan Qırım sakinleriniñ emegine yüksek qıymet kese”, – dep izaatladı mukâfatlandıruvnı Daimiy Temsilci Anton Korınevıç.

Ukraina Prezidentiniñ Qırım Muhtar Cumhuriyetindeki Temsilciligi de devlet nişanlarınen mükâfatlandırılğan Qırım sakinlerini can-göñülden hayırlay, emegiñiz ve faaliyetiñiz içün minnetdarlığımıznı bildiremiz.

Qırım Muhtar Cumhuriyeti ve Aqyar şeeri topraqlarında yaşağan, insan aqlarınıñ ve serbestlikleriniñ qorçalanması içün küreşken Ukraina vatandaşlarımızğa yüksek qıymet kesken Ukraina Prezidenti Volodımır Zelenskıy ve Ukraina Prezidenti Ofisine minnetdarlığımıznı bildiremiz.

Temsilcilik Qırım yarımadasınıñ vaqtınca işğal etilgen topraqlarında yaşağan Ukraina vatandaşlarına qol tutmağa devam etecektir.