Ükümet qararındaki deñişmeler KÇNN-lar tekrar qapatılsa, memuriy sıñırnıñ keçüvi içün ruhset bergen insaniy sebeplerni belgiledi.

İşbu insaniy sebepleri olğan şahıslar memuriy sıñırdan keçe bile:

1. qanuniy şekilde vaqtınca işğal etilgen Qırım Muhtar Cumhuriyetinde ya da Aqyar şeerinde yaşap, evlerine qaytqan Ukraina vatandaşları ve olarnıñ qoranta azaları, naqliyat vastaları, yükleri ve başqa mülkiyetleri – Ukrainanıñ vaqtınca işğal etilgen topraqlarına keçe bileler;
2. qanuniy şekilde vaqtınca işğal etilgen Qırım Muhtar Cumhuriyetinden ya da Aqyar şeerinden tış yaşağan, ya da memleket içinde avuşqan şahıslarnı qayd etüv aqqında malümat kâğıtına dair aqiqaten Qırım Muhtar Cumhuriyetinden ya da Aqyar şeerinden tış yaşap, evlerine qaytqan Ukraina vatandaşları ve olarnıñ qoranta azaları, naqliyat vastaları, yükleri ve başqa mülkiyetleri – Ukrainanıñ vaqtınca işğal etilgen topraqlarını terk ete bileler;
3. qoranta azalarınıñ eñ azından birinde insaniy sebep olsa, başqa qoranta azaları da qorantanıñ birleşmesi maqsadınen nezaret etüv noqtasından keçe bile. Ukrainanıñ vaqtınca işğal etilgen topraqlarında ya da Ukrainanıñ başqa bir de bir qısımında ana-babasından ayrı (anası, ya da babasından ayrı) bulunğan balalarnıñ ana-babası nezaret etüv noqtasından keçe bile;
4. yaqın aqrabaları ağır hasta olsa, ya da vefat etken şahıslar;
5.  şiddetli ve / ya da hronik (şu cümleden, insulinge bağlı diabet, kanser, antiretroviral, antituberkulöz) hastalıqlarınıñ tedaviylenmesine, ilaç ve tıbbiy cihazlarnen temin etilmesine muhtac olğanlar;
6. Ukrainanıñ vaqtınca işğal etilgen topraqlarından başqa devlette daimiy şekilde ya da vaqtınca yaşamaq aqqını tasdıqlağan vesiqalarğa saip olğan şahıs;
7.  16 yaşını toldurmağan bala, şahısını belgilegen ve Ukraina vatandaşlığını tasdıqlağan vesiqalarnı resmiyleştirüv maqsadınen anası ya da babası (onı evlâtlıqqa alğan kişi), vasiyi, ya da başqa qanuniy temsilcilsiniñ refaqatında nezaret etüv noqtasından keçe bile;
8. oquv yurtına oqumaq, zenaat-ameliy tasilni almaq, yekünleyici devlet sınavlarında (şu cümleden, mustaqil tışqı baalavda, zenaat, zenaat-tehnikiy tasil alğanlar içün sınavlarda, teşkiliy-tehnologik ceryanlar, mustaqil tışqı baalavlar vastasınen, istisal etüv yerlerinde ameliy azırlıq tedbirlerge azırlanuv, laborator işler ve simulâtor şekilinde keçirilgen kiriş sınavlarda, aliy tasil alıcıları içün imtianlarda ve mütenasip tedbirlerde) iştirak etmek, tasil aqqında malümat kâğıtlarını almaq, yetişkenler içün tasil ile bağlı olğan oquv ceryanında iştirak etmek maqsadınen tasdıqlayıcı vesiqaları olğan şahıslar nezaret etüv noqtasından keçe bileler;
9. milliy menfaatlarnı qorçalamaq, ya da halqara mecburiyetlerni yerine ketirmek maqsadınen vaqtınca işğal etilgen Qırım MC ve Aqyar şeerini ziyaret etken Ukrainadaki halqara müessiselerniñ, teşkilâtlarnıñ, gumanitar missiyalarnıñ, konsullıqlarnıñ vekilleri, olarnıñ naqliyat vastaları ve başqa mal-mülkleri;
10.  mirasını qabul etmek maqsadınen ketken şahıslar;
11. nezaret etüv noqtasından bir de bir tarafqa deral keçmesini talap etken, nezaret etüv noqtasından keçmesi içün başqa insaniy sebepleri olğan, ayatınıñ ya da sağlığınıñ telüke altına qoyulmamasına yol bermemek maqsadınen ketmege mecbur olğan, ya da aqları bozulğan (şu cümleden, Ukrainanıñ vaqtınca işğal etilgen topraqlarında taqip etilgen) şahıs.

İnsaniy sebeplerniñ mevcutlığı mümkün olğan allarda vesiqalarnen tasdıqlanmalı.

Qararnıñ tolu metini bu yerdedir.