Bazarertesi künü Ukraina Prezidentiniñ Qırım MC-deki Daimiy Temsilcisi Anton Korınevıç ve onıñ muavini Tamila Taşeva Almaniya Elçiliginiñ missiya Yolbaşçısı Bertram fon Moltke ile körüştiler.
Salı künü Anton Korınevıç, Darya Svırıdova ve Tamila Taşeva Avropa Birliginiñ Ukrainadaki Temsilciliginiñ Başlığı Matti Maasikas ile körüştiler. Künniñ ekinci yarısında Türkiye Cumhuriyetiniñ Ukrainada Fevqulâde ve Tolu Vekâletli Elçisi Yağmur Guldere ile körüşüv olıp keçti.
Körüşüv esnasında insan aqlarınıñ bozuluvı meselesinen bir arada Qırımnı ve Qaradeñiz regionını silâlaştiruv, yarımadağa Rusiyeden avuştırılğan adamlar esabına yerli ealini almaştıruv, bala aqlarını bozuv, Rusiye Federatsiyası tarafından teşkil etilgen arbiy teşkilâtlarğa balalarnı celp etüv, Rusiye ordusına qanunsız şekilde gençlerni çağıruv, tabiatqa ketirilgen zarar kibi meseleler de muzakere etildi. Körüşüvlerniñ müim meselelerinden biri, sanktsiyalar tertibi meselesi, Ukraina ortaqları tarafından sanktsiyalar cedvelini daqatuv ve 2014 senesi saban (mart) ayında qabul etilgen BM Baş Assambleyasınıñ qararında qayd etilgen tanımamazlıq siyasetini devam etüvdir.
Ukraina Prezidentiniñ Qırım Muhtar Cumhuriyetindeki Temsilciligi Rusiye Federatsiyası tarafından Qırım Muhtar Cumhuriyetini ve Aqyar şeerini ilhaq etüv teşebbüsini tanımağan ve vaqtınca işğal etilgen topraqlarda Ukrainanıñ topraq bütünligini ve egemenligini ğayrıdan tiklev oğrunda ğayretlerini birleştirgen ortaqlarına öz minnetdarlığını bildire.
