2018 senesi saban ayınıñ (mart) 2 künü Ukraina Prezidenti Petro Poroşenko elâk olğan Reşat Ametovnıñ ağasına Ukraina qaramanınıñ ‘‘Altın Yıldızını’’ taqdim etti.

‘‘Reşat Qırımnı Ukrainasız, ayatını ise azatlıqsız tasavur etip olamağan bir adam edi. Bu boysunmağan erkekniñ itirazını toqtatmaq içün cinayetçiler, terroristler onı öldürmege qarar ettiler’’, – dep qayd etti Prezident ve ‘‘aqrabaları Reşatnı soñki kere tamam 4 yıl evelsi, o gönülliler safına yazılıp ukrain toprağını qorçalamaq içün arbiy idarege ketkende körgenini’’ hatırlattı. Prezident elâk olğan qaramannıñ ağası Refat Ametovke bu mukâfatnı taqdim etmek onıñ içün büyük şeref olğanını qayd etti ve Reşatnıñ cesürligi ebediyen hatırada qalacağını vade etti. ‘‘Qırımnı Ukrainanıñ terkibine eñ yaqın vaqıtta qaytarmaq içün qolumızdan kelgenini yaparmız’’, – dep ayttı Petro Poroşenko.

Qaramannıñ ağası Refat Ametov öz nevbette Prezidentke bu yüksek devlet mükâfatı içün teşekkür etip, qardaşı Ukraina vatandaşı olğanınen daima ğururlanğanını bildirdi. ‘‘Ürmetli Prezidentimiz, qardaşımnıñ ölüminde qabaatlı olğan adamlarnı tapıp yaqalamağa ve cezalamağa rica etem. 2014 senesi Reşatnıñ qaramanlığını birinciler sırasında qayd etkeniñiz içün Sizge öz teşekkürimni bildirem. Bu pek muim adım edi’’, – dep ayttı Refat Ametov ve Reşatnıñ öksüz qalğan balalarına yardım etken bütün ukrainalılarğa teşekkür etti. Prezident Ukraina akimiyeti bu cinayette iştirak etkenlerni tapmaq içün qolundan kelgenini yapqanını qayd etti. Onıñ fikirince, mında eki taraf bar – satqın Yanukoviçqa qarşı makeme ve Rusiye üsünde halqara makeme ceryanı olmalı.

Qırımtatar halqı Milliy Meclisiniñ reis muavini Ahtem Çiygoz Prezidenke işbu muracaatta bulundı: ‘‘Halqımız Ukraina devletimizge pek işana. Ve eñ büyük ümütni Siznen, yañı Ukrainanıñ yañı Prezidentinen bağlıdır’’. Onıñ aytqanlarına köre, qırımtatar halqı Devlet başlığınıñ sözlerine ve areketlerine büyük diqqat ayıra. ‘‘Bu küreşimizge küç bere. Apishanelerde oturacağımıznı bilemiz. Ve, teessüf ki, bazılarımız elâk olacaq. Amma bunı ne maqsat ile yapqanımıznı da bilemiz. Kelecegimiz beraberlikte’’, – dep qayd etti Ahtem Çiygoz.

‘‘Sizge bizim halqımıznıñ eñ muim meselesiniñ çezilüvi bağlı – bu da milliy-territorial muhtariyetimizniñ tiklenüvidir. Emin oluñız ki, em Ukrainanıñ mustaqilli içün, em halqımıznıñ menfaatı içün küreşçi olaraq halqımıznıñ hatırasında ebediyen qalırsıñız. Amerikada yüksek minberden qırımtatar olğanıñıznı ilân etken ediñiz. Ve halqımız bunı iç bir vaqıt unutmaz’’, – dep muracaat etti Petro Poroşenkoğa Ahtem Çiygoz.

Qırımtatar Miliy Meclisiniñ reis muavini de Reşat Ametovğa berilgen eñ yüksek devlet mükâfatı içün teşekkür etti.
‘‘Ukraina qırımtatar halqına Qırımda çoqtan milliy muhtariyetni bermege kerek edi. Öyle alda belki şimdi vaziyetimiz başqa olur edi’’, – dep qayd etti öz nevbette Ukraina Prezidenti.