Prezident Petro Poroşenko ilhaq etilgen Qırımnı ziyaret etken Rusiye reberiyeti halqara uquqnı bozğanını qayd etti. Slovakiya Prezidenti ile umumiy matbuat konferentsiyası devamında Rusiye prezidenti Putinniñ Qırımğa ziyareti aqqında sualge cevap berer eken, ‘‘Elbette, rusiye Prezidentiniñ areketlerine halqara uquqnı qaba şekilde bozuv olaraq qıymet kesemiz’’, – dep qayd etti Petro Poroşenko.

‘‘Çetel işler Nazirligimizge halqara uquqnıñ işbu şekilde bozuluvına mütenasip qıymet kesmege avale ettim’’, – dep qayd etti Devletimizniñ Başlığı. Onıñ aytqanına köre, risuye reberiyetiniñ böyle areketleri halqara uquqnı tolusınen körmemezlikke urğanını tasdıqlay. ‘‘Onıñ içün halqara cemiyet Rusiye Federatsiyasına qarşı sanktsiyalarını kirsetti. Böyle areketler ne qadar devam etse, eminim ki, sanktsiyalar da o qadar devam etecektir’’, – dep qayd etti Prezident.

‘‘Şunı da ayrıca qayd etmek isteyim ki, ve bizni Rusiyede de eşitsinler – bu ziyaretler neticesinde Qırım Rusiyege çevirilmez. Qırım – Ukrainadır. Ukraina edi ve olacaqtır’’, – dep ayrıca qayd etti Petro Poroşenko.