Ukraina Prezidenti, Ukraina Arbiy Quvetleriniñ Baş Komandanı Petro Poroşenko Odesa şeerinde çoqmilletli halqara ‘‘Si Briz-2018’’ talimlerini teşkerüv esnasında,Qaradeñiz regionında arbiy-strategik vaziyet pek kergin olğanını qayd etti. Ukraina Prezidenti qayd etkenine köre, ‘‘Qırımnıñ qanunsız işğalinden soñ biz kerginlikniñ arttırıluvını seyir etmektemiz. Qanunsız alda işğal etilgen topraqlarda Rusiye öz arbiy quvetlerini arttırdı. İlk olaraq, anda ileri ava küçleri, eñ zemaneviy raketalar ve uçaqsavar tertibatları yerleştirildi. Körgenimiz kibi, ilhaq etilgen ukrain Aqyarında yerleştirilgen Rusiyeniñ Qaradeñiz flotı yañı suvaltı ve arbiy gemilerinen quvetlendirildi, uzaq mesafelerge uça bilgen deñiz raketalarnen silâlandırıldı. İşğalci devletniñ arbiy gemileri Azaq deñizinde de ziyadeleşti’’.

Petro Poroşenko, Azaq deñizindeki ukrain limanlarına yol tutqan gemilerni Rusiye qanunsız şekilde toqtatıp teşkermege başlağanı aqqında haber etti, em de söz yalıñız ukrain degil de, çetel gemileri aqqında da yürsetile. ‘‘Köremiz ki, bunıñ episi Ukrainanı Azaq deñizinde tosmenge tutmaq içün yapıla. Vaziyetni kerginleştirmek, belki de qara madencilik mallarınıñihracatını yapqan Mariupolge ücüm etmek istey’’, – dep bildirdi Ukraina Prezidenti. Baş Komandan Ukraina Arbiy-Deñiz Quvetleriniñ uruşqa qabiliyetini küçlendirmek kerek olğanını ayrıca qayd etti. ‘‘Onıñ içün böyle vaziyette Ukraina Arbiy-Deñiz Quvetleriniñ uruşqa qabiliyeti ve azırlığı, em de NATO Şimaliy Atlantik Şurasınıñ azaları olğan ortaqlarımıznen ve Qaradeñiz regionında havfsızlıq boyunca ortaqlarımıznen işbirligimiz ğayet müimdir’, – dep qayd etti Baş Komandanımız.