İlk yaz (iyün) 19 künü Ukraina prezidenti Volodımır Zelenskiy ”Yalta Avropa strategiyası” közetüv şurasınıñ azaları ile körüşti.

Devlet başlığı ”YES” vekillerini öz faliyetiniñ ilk nevbetteki vazifeleri ile tanıştırdı, olarnıñ arasında Ukrainağa tınçlıqnı qaytaruv, devletimizniñ egemenligini ve topraq bütünligini qorçalav, muntazam şekilde islâatlarnı keçirüv, devletniñ mudafaa qabiliyetini quvetleştirüv, memleketniñ muvafaqiyetli inkişafı içün mütenasip şaraitlerni yaratuvdır.

Bundan ğayrı, prezident Frenkistanğa ve Almaniyağa yapqan resmiy ziyaretleriniñ neticeleri aqqında ikâye etti. Aytqanına köre, muzakereler esnasında esas diqqat Donbastaki cenkni toqtatuvğa ve esirge alınğan ukrainalılarnı, bu cümleden, ukrain deñizcilerini qaytaruvğa ayırıldı.

Volodımır Zelenskiy davanı barışıqlı yolnen çezüv boyunca Üç taraflama kontakt gruppasınıñ körüşüvi bügün keçirilecegi aqqında haber etti. ”İnanam ki, eñ yaqın vaqıtta tınçlıqnı irişmek isteginde bizim tarafımız yalıñız degildir”, – dep qoştı o.

Prezident haber etkenine köre, oraq (iyül) ayında Normand formatınıñ azaları olğan devlet yolbaşçılarınıñ ve ükümetleriniñ tışqı siyaset boyunca mesleatçıları körüşmeli.

Bundan ğayrı, o, Donbastaki infraterkipni ğayrıdan tiklemek kerek olğanına diqqat ayırdı. Devletniñ başlığı berim (sentâbr) ayında regionnıñ ğayrıdan tiklenmesi içün sermiyalarnı celp etmek maqsadınen forum planlaştırılğanını qayd etti.

Bundan ğayrı, ”Yalta Avropa strategiyasınıñ” 2019 senesi berim ayında nevbetteki 16-nci toplaşuvınıñ keçirilüvi muzakere etilgen.

”Yazıqlar olsun ki, bu körüşüv kene de Livadiya sarayında keçmeycek, amma siziñle beraber eñ yaqın vaqıtta ukrain Yaltasına qaytmağa ümüt etem”, – dep ayttı prezident.

https://www.president.gov.ua/news/prezident-ukrayini-volodimir-zelenskij-zustrivsya-z-chlenami-55993