Ukraina Prezidenti öz intervyusında Qırım ile memuriy sıñırda infraterkipni eyileştirmek ve Amerika Birleşken Devletleri ile işbirlikni quvetleştirmek ne qadar müim olğanı, olarnıñ yarımadanı işğalden azat etüv ceryanındaki rölü, Rusiyege sanktsion basqınıñ ve ”Qırım platformasınıñ” emiyeti aqqında hatırlattı.

”Daa bir mesele bar. Amerika Birleşken Devletleriniñ yardımı olmadan Qırım meselesi çezilemez, dep tüşünem, çünki Qırım ve yarımadanı işğalden azat etüv meseleleri Normand formatı ve Minsk añlaşmalarınıñ kün tertibinde yoqtır. Altı yıldır bu mesele avada asılıp turdı, Avropa ve Amerika Birleşken Devletleri keçekten de qollarından kelgenini yaptılar, amma işğalden azat etüv oğrundaki adımlar Qırım yarımadasını adım-adım işğalden azat etüv haritasını belgilegen mütenasip devletler birligi, liderler birligi tarafından yapılmalıdır. Al-azırda biz ”Qırım platformasını” teşkil etemiz ve, elbette, onıñ terkibinde Qırımnı qaytaruv ve işğalden azat etüv meselesinde esas röl becerecek, bunı kefil etecek devletlerni körmege isteymiz. Qırımnı qaytarmaq ve topraq bütünligimizni ğayrıdan tiklemek kerekmiz. Ve ABD bu yönelişte lider vazifesini becere bile”.