Ürmetli Ukraina cemaatı!

1948 senesi BMT Baş Assambleyası, bütün insanlar teñ aqlarğa saip olğanını tasdıqlağan  birinci halqara vesiqası – insan uquqları boyunca umumiy Deklaratsiyanı qabul etti.

Bu kiçik kölemli, amma pek nufuzlı akt 370 tilge tercime etildi ve mütenasip saada halqara qanunlarınıñ özgün cıyıntığı olaraq qabul etile. O, medeniyetli cemiyetniñ esas çizgileri ve uquqiy devletniñ birinci nevbetteki boyun-borcu olaraq insan uquqlarına riayet etüvni belgiley.

İşbu Deklaratsiya, 1966 senesi dekabr 16 künü qabul etilgen İqtisadiy, içtimaiy ve medeniy aqlar boyunca ve Vatandaş ve siyasiy aqlar aqqında halqara paktlar ile beraberlikte İnsan aqları boyunca halqara bill olaraq tañıla.

Ukraina vatandaşları dünya memleketleriniñ ittifaqdaşlığı ile beraberlikte bu künni qayd etkende, yalıñız devlet ve vatandaş arasındaki munasbetleriniñ negizlerini hatırlamaqnen yetinmey ve  insan aq-uquqlarınıñ qorçalavı Esas Ukraina Qanunı ile belgilengen baş milliy baylığı olğanını tasdıqlaylar.

Onıñ qıymeti esasen bügün, hain rus istiâsı işğal etilgen Qırımda ve Donbasta insan ayatlarını bozğanda daa ziyade duyulmaqta. Avropada halqara uquq esaslarınıñ bozulmasını maqsat etken Rusiye Federatsiyası çeşit türlü usullarnen areketlerinden çetleşmege istey.

Eminim ki, halqara birdemlik, Ukraina ile fikirdeşlik ve halqara uquqnıñ  itibarı Kremlge  niyetlerini kerçekleştirmesine ve mesüliyetten qaçmasına yol bermez.

Bu künlerde vatandaşlarımıznı, Rusiye tarafından zorlı şekilde tutulğan ukrainalı siyasiy mabüslerni añamız.

Bizim ile beraberlikte mabüslerni azat etmege areket etken ecnebiy arqadaşlarımızğa teşekkürlerimizni bildirem. Eminim ki, adalet ve kerçek ille de ğalebe qazanır.

İşğal olunğan Qırımda vaziyet pek acınıqlı, rus istilâsı şaraitlerinde Ukraina vatandaşlarınıñ aq-uquqları devamlı şekilde bozulmaqta. Ve basqı kün künden artmaqta.

Olar içün yalıñız Ukraina degil, bütün dünya küreşe. İnsan aqlarınıñ, menlikleriniñ,  azatlıqlarınıñ qorçalavına yönelgen halqara cebemizni küvetleştirmege devam etemiz. Ve bu yönelişte bazı ğalebelerimiz de bar.

Bu cümleden, Ukrainanıñ muracaatına binaen Halqara cinaiy mahkeme Ukrainada Menlik İnqilâbı devamında yüz bergen cinayetlerni ve Rusiye Federatsiyasınıñ istilâsını taqiq ete. Yaqınlarda bu yüksek itibarlı Mahkeme nevbetteki esabatında Rusiye silâlı istilâsı aqqında açıq-aydın beyan etti. Moskva ne yapsa yapsın, amma bizim toprağımızda cinayetleri muntazam sürette Gaagada qayd etile.

Ürmetli vatandaşlar!

Ayrıca çeşit türlü sebeplerden işğal olunğan Qırımda, Lugansk ve Donetsk vilâyetleriniñ ayrı rayonlarında  yaşamağa devam etken vatandaşlarımızğa muracaat etmege isteyim.

Adaletke ve Ukraina devletine sarsılmaz işançıñız, cesaret ve eminligiñiz içün sizge çoqtan-çoq teşekkür bildirem.

Eminim ki, muntazam areketlerimizniñ ve birleştirilgen halqara qoltutuvnıñ neticesinde, Ukrainanıñ öz mustaqillik ve territorial bütünligi içün alıp barğan küreşinde ögünde turğan bütün meşaqatlardan keçermiz.

Devletniñ başlığı olaraq, işğal etilgen Ukraina topraqlarınıñ qaytarıluvı içün elimden kelgenini yaptım, yapmağa devam etecem ve işğalciden zarar körgen er vatandaşımız içün küreşecem.

İnanıñız ki, işğal etilgen topraqlarda Ukraina akimiyeti ğayrıdan tiklengen soñ, vatandaşlarımıznıñ aq-uquqları mıtlaqa qorçalanır.

Bunınen beraberlikte, Ükümetni ve cemaat teşkilâtlarımıznı 2015 senesi Emirim ile pekitilgen insan aq-uquqları boyunca Milliy strategiyanı yerine ketirilüvi üstünde çalışmağa çağıram.

Sizge demokratik ve uquqiy devletniñ quruluvı ve qaviyleştirüvi oğrunda küç-quvet tileyim.

Ukrainağa şan-şüretler olsun!