2020 senesi arman ayı 17 künü Rostov-na-Donu şeerinde Cenübiy arbiy nahiye makemesiniñ makemecisi Zubayırov sözde ”Hizb ut-Tahrir teşkilâtınıñ Bağçasaray gruppası’’ boyunca cinaiy iş çerçivesinde taqip etilgen aq qorçalayıcılar Seyran Saliyev ile Server Mustafayevni qorçalağan qırımlı abulqat Lilya Gemicige, makeme toplaşuvlar boyunca reglamentni sözde defalarca bozğanı içün şahsiy tenbi çıqardı. Endi işbu tenbi Çeçenistanğa Gemeci abulqat olaraq qayd etilgen abulqatlar odasına yollanılacaqtır. Bu aqta Qırım birdemligi haber ete.
Lilya Gemeci işbu qararğa sıñırlayıcı dep qıymet kese ve kelecekte makeme qararı olmadan bir şeyler aytmağa tırışsa, müvekkillerini qorçalav fırsatından marum etip, onı toplaşuvdan çetleştire bileceklerini tahmin ete. Gemeci, bunıñ yalıñız sahsen oña değil de, aynı vaqıtta mevamları faal olğan bütün zenaatdaşlarına qarşı bir basqı olğanına inana. Abulqatlar kollegiyası işbu tenbige qarşı öz itirazını bildirecektir.
”Abulqatlarnıñ şahıs ve devlet içün temel vazifesi, abulqatlarnıñ meslekiy faaliyetleriniñ kefaleti, keyfiyetli qanuniy qorçalav aqqı köz ögüne alınğanda, em milliy qanuniyet seviyesinde, em de halqara uquqiy senetlerde yüksek qıymet kesilmektedir. Keyfiyetli qanuniy qorçalav aqqına kelgende, abulqat tutmaq aqqı, abulqatlarnıñ rölüne dair BM temel esaslarında tafsilâtlı şekilde beyan etilgendir. Aynı vaqıtta ükümetler, abulqat faaliyetini qorqutuvlardan, qanunsız alda taqip etüvlerden serbest şekilde alıp barılmasını ve abulqatlarnıñ müvekkillerine maniasız irişimni temin etmege borçlular. Bu şartlarnıñ episi al-azırda Qırım siyasiy mabuslarını qorçalağan abulqatlarğa nisbeten Rusiye Federatsiyası tarafından bozulmaqta”, – dep izaatlay Ukraina Prezidentiniñ Qırım MC-deki Daimiy Temsilcisiniñ Birinci muavini Darya Svırıdova.
Qırım abulqatlarınıñ onsız da müşkül vaziyeti siyasiy sebepten daa ziyade beterleşe. Qırım SOS teşkilâtı 2019 senesi boş ayda yapqan (https://krymsos.com/ru/reports/analitichni-zviti-po-krimu/5dbff2364f571/) tedqiqatqa köre, rejim içün oñaytlı olmağan gruplarnı taqip etüv, ayrı bir ceza davaları ve idariy davalar kategoriyasınıñ – yani tek siyasiy sebeplerge dayanğan davalar kategoriyasınıñ teşkil etilmesine yol açqanını kösterdi. Bu sınıflandırma, siyasiy davalarnıñ qurbanlarınen çalışqan abulqatlarnıñ uquqiy mevamına deral tesir etti ve olarnıñ zenaat aqlarınıñ bozulmasına sebep oldı. Mahkemeler öz nevbette bu ceryanlarnı qanunlaştırmaq ve resmiyleştirmek maqsadınen abulqatlarnıñ ceryanda iştirak etmelerine ruhset bere. Neticede Qırım kerçeklerinde esas vazifeleri muayyen kişiniñ aq-uquqlarını qorçalav ve ğayrıdan tiklev olğan Qırım abulqatları yarımadanı işgal etken devletniñ sorğu, savcılıq ve mahkeme organlarına bütünley tabiyler.